Vetëm pak muaj pasi dha dorëheqjen si kryeministër i qeverisë italiane e si drejtues i PD-së qeverisëse, Matteo Renzi ka dalë fitues në zgjedhjet partiake.
Renzi, që dorëheqjen do ta jepte pas dështimit në referendumin për planin e reformës kushtetuese, ka marrë më shumë se 70 për qind të votave në zgjedhjet e së dielës në Partinë Demokratike.
Ndërsa kanë votuar rreth dy milionë anëtarë të partisë së qendrës së majtë, Matteo Renzi do të shpallej fitues në rivalitetin me ministrin e Drejtësisë Andrea Orlando dhe me qeverisësin e rajonit të Puljas, Michele Emiliano. I pari prej këtyre të fundit do të siguronte vetëm 19 për qind të votave, e i dyti nëntë për qind të tyre.
“Kjo është një përgjegjësi e jashtëzakonshme,” raporton BBC-ja të ketë shkruar Renzi në Instagram. “Falënderime të përzemërta për burrat dhe gratë që besojnë në Italinë,” ka qenë fjalia tjetër përshëndetëse e ish-kryeministrit 42-vjeçar.
Me anketimet që flasin për një rrëshqitje të mbështetjes popullore për partinë e Renzi-t, ky do duhet ta përgatisë organizmin e tij politik për zgjedhjet e ardhshme parlamentare të një viti më pas. /tesheshi.com/
