Kryeministrja e re e Britanisë së Madhe, Theresa May i ka dhënë ish-kryebashkiakut të Londrës Boris Johnson një nga detyrat më të rëndësishme në qeveri. Gazetat dhe politikanët në të gjithë botën kanë reaguar ndaj caktimit të Boris Johnson në detyrën e sekretarit të jashtëm të Britanisë së Madhe.
Shumë janë të suprizuar e citojnë historinë e tij të gafave të kaluara ku përfshihet edhe ofendimi i presidentit të Turqisë apo komentet për paraardhësit kenianë të presidentit amerikan. Në një panoramë të komenteve dhe reagimeve në vende të ndryshme, duket se Johnson nuk do të pritet më admirim në shumë prej tyre, ku ai do të përfaqësojë Britaninë e Madhe.
“The Washington Post” publikon një përmbledhje të gjërave “jodiplomatike” që Johnson ka thënë gjatë jetës së tij publike.
“Boris Johnson, kryediplomati i Britanisë, ka thënë disa gjëra vërtet shumë jodiplomatike”, shkruan gazeta. Analisti i “Washington Post ”, Ishaan Tharoor shkruan gjithashtu se ai ngjalli kundërshti kur doli kundër trendit ndërkombëtar dhe vlerësoi presidentin sirian, Bashar al Assad për luftën ndaj ISIS, pavarësisht se ai bënte një fushatë paralele dhune kundë popullsisë civile në Siri.
Ndërkaq, duke u përpjekur dukshëm të mbajë një buzëqeshje kur dëgjoi lajmin për detyrën e re të Johnson, zëdhënësi i departamentit Amerikan të Shtetit, Mark Toner tha se SHBA do të punojnë gjithmonë me Britaninë e Madhe për shkak të “marrëdhënies speciale” midis dy vendeve.
“Kjo është një marrëdhënie që shkon përtej individëve dhe është një moment absolutisht kritik për historinë e Anglisë por gjithashtu edhe për marrëdhënien SHBA-Britani”.
Në Francë “Le Figaro” thotë se “legjendari” Johnson të jep përshtypjen se drejtohet nga oportunizmi. Gazeta thotë se karriera politike e sekretarit të jashtëm të Britanisë së Madhe shpalos faktin se ai ka ndryshuar mendje mbi martesat gej dhe për anëtarësimin e Turqisë në Bashkimin Europian.
Në Gjermani, ku “Der Spiegel” mori linjë editorial kundër Brexit dhe publikoi një edicion “Ju lutem, mos u largoni” gjatë fushatës së 
referendumit në Britani, tashmë e cilëson Johnson “një politikan kontrovers”. Gazeta vë në dukje se vendimi i tij për të mbështetur votën e largimit të Britanisë nga BE ishte një faktor vendimtar në fushatën e referendumit, që u fitua nga vota Brexit me 52 për qind.
Gazetarja gjermane, Laura Schneider thekson se spikerët e lajmeve nuk e mbajnë dot të qeshurën kur njoftojnë për detyrën e re të Johnson.
Në Rusi, kreu i komitetit shtetëror të Dumës, Aleksey Pushkov, shkroi në Twitter se pararendësi i Johnson, Philip Hammond, kishte “komplekse të dhimbshme anti-ruse” që ai shpreson të mos i ketë edhe pasaardhësi në detyrë, Johnson.
Hammond deklaroi vitin e kaluar se Rusia kishte potencialin të ishte “kërcënimi i vetëm më i madh” për sigurinë e Britanisë dhe se presidenti Vladimir Putin ishte “i prirur të mos bashkohej me sistemin e rregullave ndërkombëtare që mbajnë paqen mes kombeve, por ta anashkalonte këtë sistem”.
Faqja ruse online ria.ru e cilëson Johnson “një nga politikanët më eksentrikë në Britani”, dhe thotë se ai “di si të habisë”.
Në Turqi, gazeta “Haber Turk” përmend caktimin e Johnson por nuk vë në dukje incidentin kur ai ofendoi presidentin.
Në Australi, gazetat e cilësojnë Johnson një person të prirur për gafa, duke printuar një listë të incidenteve të tij e duke thënë se emërimi në krye të diplomacisë britanike është një “rikthim befasues” pasi ai u largua nga gara për t’u bërë kryeministër.
Në Suedi, ish-kryeministri Carl Bildt, shkroi se do të dëshironte që emërimi i Johnson të ishte një shaka.
Përgatiti: Juli Prifti – /tesheshi.com/
