Pas akuzave se ka marrë 200 mijë euro për të mos mbështetur Sherefedin Shehun, ish-kryetari i PD-së së Dibrës dhe ish-deputeti Rrahim Kaleci, deklaroi se sulmet ndaj tij janë të turpshme dhe se ai nuk do ta mbështesë publikisht kandidatin e opozitës.
Në një deklaratë për Top Channel, Kaleci tha se ai u shkarkua si fajtor për humbjen e bashkisë së Dibrës kur ai e kishte kundërshtuar kandidaturën e Ilir Krosit.
“Jam një anëtar i thjeshtë i Partisë Demokratike. Theksoj që vota ime shkon për kandidatin e Partisë Demokratike, por unë nuk do të marr përgjegjësi për drejtimin e fushatës. Në këto kushte, edhe për të hedhur poshtë të gjitha akuzat që janë nxitur nga segmente të caktuara të Partisë Demokratike, jo vetëm nga dashakeqës, unë kam vendosur që këtë radhë të mos jem në Dibër. Do të shkoj vetëm për të votuar”, tha Kaleci.
Ish-deputeti i PD-së akuzon qëndrën se nuk ka bërë analizën e saktë të humbjes.
“Një vit më parë, Partia Demokratike humbi zgjedhjet lokale në Dibër dhe unë mendoj që arsyet janë të lidhura me kandidatin, pasi ai kandidonte për herë të katërt. Shumë nga drejtuesit e Partisë Demokratike mes tyre, edhe kandidati aktual Sherefedin Shehu ishin të mendimit se ishte përgjegjësia ime personale për humbjen”, sqaron Kaleci.
Ndërkaq, ai ka qenë i ashpër ndaj akuzatorëve të tij.
“Do të përballen me kallëzimin që unë do të depozitoj pranë Prokurorisë së Tiranës, por edhe një padi civile në Gjykatën e Tiranës”, ish-kreu i PD-së së Dibrës.
/tesheshi.com/
