Njeriu që deri pak vitesh ishte numri dy i Drejtësisë shqiptare, n/kryetar i KLD, i “dënuar” për të qenë një ndër figurat me serioze të shtetit, ka kërcënuar se Tirana do të bëhet zjarr më 18 shkurt dhe se do Kryeministria do të rrethohet për një muaj deri sa të largohet Edi Rama.
Kreshnik Spahiu, tashmë si kreu i AK-së, një grupim politiko-folklorik, i njohur për deklarata të tilla të kontraverse, nganjëherë edhe qesharake, duke folur në prezencë të përfaqësuesve të PD-së, deklaroi se Rama nuk është më i vështirë për t’u rrëzuar sa Enver Hoxha dhe Ramiz Alia.
“Do të rrethojmë kryeministrinë për 30 ditë. Të mos shkulemi nga sheshi deri sa t’i rrëzojmë. Ky është pushteti i dashnoreve, të gjithë e dinë se kanë mbushur me femra, ndaj boll më, t’i rrëzojmë”, tha njeriu që dikur i janë besuar dy poste të larta shtetërore, të drejtojë KQZ-në dhe KLD-në.
Kujtojmë që fillimet e tij politike në krye të AK-së – Aleancës Kuqezi së cilën Berisha i cilësonte si faqezi – Spahiu arrinte deri diku t’i joshte turmat opozitare në kohën e qeverisjes së PD-së, ndërsa sot partia e tij është rrudhur në një grusht plismbajtësish që ndezin fishekzjarre dhe hedhin shashka në tubime të ndryshme, të cilat i pagëzojnë si zjarre që duhet të përvëlojnë pushtetin. /tesheshi.com/
