Ish-nënkryetari i Kuvendit, Namik Dokle u shpreh i pakënaqur, për të mos thënë i neveritur nga përdorimi i peshqirëve të plazhit me simbole kombëtare. Duket i ndodhur në plazh për të kaluar pushimet, edhe pse nuk e identifikon se se ku, ai ka shkruar një status në Facebook ku shprehet se peshqirët e plazhit që imitojnë flamurin kombëtar të lënë shije të keqe.
“Nuk doja të bezdisja njeri me statuset e mia në këtë verë të nxehtë dhe njëherësh të djersitur politikisht, por edhe në breg të detit shikon gjëra që të bëjnë të shkruash. Pashë një peshqir plazhi në imitim të flamurit tonë Kombëtar. Shqiponja nën prapanicë…O njerëz, prodhoni ç’të doni me simbolet kombëtare, por jo peshqirë plazhi! Të brendshme jo e jo!”, ka shkruar Dokle.
Stampimi i simboleve kombëtare në suvenire ka kohë që është shtrirë edhe mbi sende të përdorimit të përditshëm, një praktikë që u përhap së tepërmi në plazhet e Shqipërisë që kur ato nisën të frekuentohen masivisht nga qytetarët e Kosovës dhe viseve të tjera shqiptare. /tesheshi.com/
