Firmosja e dekreteve nga presidenti Bujar Nishani një ditë para afatit zyrtar që i takon me Kushtetutë, nuk ka larguar “retë” e një rrebeshi që tashmë ka plasur mes qeverisë dhe kreut të shtetit.
Ish-kryetari i Gjykatës Kushtetuese, i tha tesheshi.com se nuk ka arsye ta dramatizojmë; por kjo nuk do të thotë se s’ka lojë politike. “Deri nesër në mëngjes Presidenti kishte afat ligjor për të dekretuar ministrat, por ai e ka provokuar vetë përplasjen sepse kreu dy veprime që e ushqejnë këtë: e para firmosi vetëm shkarkimin e ministrave dhe e dyta dërgoi në Gjykatën Kushtetuese për intepretim këtë çështje”.
Sipas konstitucionalistit të njohur, që tashmë jep leksione në Universitet, çështja është e qartë dhe nuk ka pse acarohet.
“Gjykata Kushtetuese nuk ka pse futet fare këtu, madje ajo nuk do ta kishte shqyrtuar, sepse Presidenti ka të drejtën të shprehet. Derisa ai e ka bërë veprimin apo e ka marrë aktin, nuk përbën një dilemë kushtetuese që të ketë nevojë për intepretim”.
Ish-kreu i institucionit që intepreton ligjin themeltar të shtetit, megjithatë ka bërë thirrje si nga qeveria ashtu edhe nga Presidenca që të mos gjuajnë me top njëri-tjetrit.
“S’kanë pse marrin zjarr. Kanë ligjin, të firmosin aktet”. Ky është shteti ligjor”, thekson Abdiu.
Ai duke sjellë ndërmmend rastin e qeverisjes me zv.ministra të Fatos Nanos, theksoi se ai e bëri këtë se nuk kishte numrat në Kuvend dhe nuk kishte çuar propozimet në Presidencë.
“Kushtetuta jonë këtë çështje e ka sqaruar më së miri. Nëse do të duan të bëjnë politikë ka aq shumë gjëra dhe mund të kursejnë kompetencat e institucioneve bazë”, thekson ish-kreu i Gjykatës Kushtetuese. Përgatiti Ylli Pata – /tesheshi.com/
