Nga Gani Gashi
Prokurori i EULEX-it më kot ka pritur të enjten që të marrë në pyetje në zyrat e Prokurorisë Themelore të Mitrovicës, Krstimir Pantiqin dhe Igor Janiqieviqin, dy të dyshuarit për prishje të zgjedhjeve lokale më 2013, në veri të Mitrovicës. Ata nuk janë paraqitur para prokurorit edhe pse me kohë ishin kontaktuar nga Prokuroria Themelore e Mitrovicës dhe Policia e Kosovës.
Krstimir Pantiq, ish-kryetar i komunës së veriut të Mitrovicës dhe bashkëpunëtori i tij Igor Janiqieviq, akuzohen për prishje të këtyre zgjedhjeve.
Portali tesheshi.com, ka siguruar një korrespodencë në mes EULEX-it dhe policisë së Kosovës, nëpërmjet së cilës i bëhet thirrje i Pantiqit dhe bashkëpunëtorit të tij, Igor Janiqieviqit, që të enjten më 30 korrik në ora 10:00 të paraqiten në Prokurorinë Themelore në Mitrovicë, para prokurorit ndërkombëtar.
Sipas dokumenteve Pantiq dhe Janiqieviq, thirren për marrje në pyetje “në përputhje me nenin 51 paragrafi 2 dhe 174 paragrafi 2 3 4 5 të Kodit të Procedurës Penale të Kosovës, jeni i thirrur si i pandehur përpara prokurorit të EULEX-it në kohën dhe datën e mëposhtme për t’u marrë në pyetje në një sesion paragjyqësor në kuadër të procesit penal për rastin PP/806/15”.
“Ju informojmë se jeni i akuzuar për kryerje të këtyre veprave: “Agresion sipas nenit 187 (1) të Kodit Penal të vitit 2013, dhe nenin 13 të Kodit Penal; Dhunim të vullnetit të lirë të votuesve sipas nenit 213 të Kodit Penal dhe Kërcënim sipas nenit 185 të Kodit Penal 2013”, thuhet në dokumentin që ka siguruar portali tesheshi.com.
Në dokument më tej thuhet se “paralajmëroheni se në rast se nuk paraqiteni përpara prokurorit të EULEX-it në datën dhe orën e caktuar, ndaj jush do të lëshohet urdhër-arresti dhe do të detyroheni të paraqiteni”.
Kërstimir Pantiq, është deputet në parlamentin e Serbisë nga partia SNS e kryeministrit Aleksandar Vuqiq.
Sipas burimeve të portalit, Pantiq në ditën kritike ka qenë kandidat për kryetar të komunës së veriut të Mitrovicës nga lista serbe dhe duke e parë se po humb në garë me ish-kandidatin e iniciativës qytetar SDP (Serbia Demokracia dhe Drejtësia ) e Oliveri Ivanoviq, rreth një orë para mbylljes së kutive të votimit, dyshohet se ka organizuar grupe kriminale serbe që të prishin votimin duke thyer kutitë në shkollën fillore ‘Sveti Sava’, në veri të Mitrovicës.
Kërstimir Pantiq, njihet si njeri shumë i afërt me ish-krerët e krimit në veri të Mitrovicës dhe Kosovës, Zvonko dhe Zhakrom Veselinioviq, si dhe më Millan Radonjqiq.
Më konkretisht, ditën e zgjedhjeve, Pantiq ka organizuar vëllezërit Veselinioviq dhe grupin e tyre, si dhe një grup të xhandarmërisë serbe, të cilët të armatosura e me dhunë kanë hyrë në qendrat e votimit duke kërcuar personelin e aktivizuar në zgjedhje dhe nën kërcimin e armëve dhe shkopinjve të bejsbollit kanë thyer kutitë e votimit.
Pas kësaj Komisioni Qendror i Zgjedhjeve dhe OSBE-ja, kanë anuluar zgjedhjet e mbajtur në këtë qendër votimi, e të cilat në vonë janë përsëritur.
Burimet e portalit tesheshi.com, kanë bërë të ditur se “Pantiq dhe Janiqieviq, janë duke qëndruar në Beograd, ndërsa për paraqitjen e tyre para prokurorit ndërkombëtar të EULEX-it, Zyra Serbe për Kosovës është duke kërkuar nga misioni ndërkombëtar që Pantiq dhe Janiqieviq të mos arrestohen. /tesheshi.com/
