Benet Beci, surpriza e listës së PS-së për Shkodrën, ka shpalosur në të parën intervistë qëkur emri i tij u theksua si kandidat për deputet në rrethin verior, vizionin e një Shkodre që do rikthehet te fama e 200 viteve më parë.
Në një bisedë me gazetaren e TiranaPost Mira Kazhani, Beci tha se “Shkodrën e shoh si një program të madh dhe jo si një detyrë për të zgjidhur ato gjërat e vogla me të cilat mbyten ndonjëherë deputetët e zones; gjej një punë, hiq njërin nga puna e merr tjetrin”.
“Nuk them, edhe hallet e përditshme janë pjesë e së gjithës, por nëse ti jep zgjidhje të mëdha në terma afatgjatë dhe i bën njerëzit të mos kenë nevojë të të marrin në telefon për çdo gjë, atëherë ke bërë vërtet diçka”, shprehet Beci.
Madje ai ofron dhe një zgjidhje për goditjen e krimit në Shkodër.
“Krimi përfiton nga varfëria. Unë besoj se krimi ka komfort në Shkodër sepse ka varfëri. Jam i bindur se ku ka begati krimit i zvogëlohet qafa.
Nëse ti u jep mundësi njerëzve, bizneseve, turizmit, gjërat ndryshojnë. Zhvillimi dhe krimi nuk ecin bashkë kurrë. Ndaj them, Shkodra ka nevojë për shpejtësi të madhe. Dua ta bëj shpejt dhe mirë”, thotë Beci.
Ish-kreu i Fondit Shqiptar të Zhvillimit nën qeverinë Berisha, ai ia njeh meritën këtij të fundit për shumë investime në rrjetin rural.
“Kur e gjeta në 2005-n, PS-ja e kishte lënë në gjendje të mjerë. Investimet përdoreshin vetëm për bastionet e PS-së dhe ato të PD-së, asgjë. Qasja ime kryesore është balanca. Berisha e kuptoi dhe më besoi. Meqë më pyete për miqësi, di të them që me Berishën kemi pasur raport të shpeshtë, tepër korrekt dhe profesional”, shprehet Benet Beci, i cili pasi ia dorëzoi drejtimin e FSHZH-së Dritan Agollit, morri drejtimin e një tjetër sektori delikat, KESH-it.
I biri i akademikut të njohur, gjuhëtarit Bahri Beci, ai citon të atin për atë çfarë i ka thënë kur Rama e ka përzgjedhur kandidat për deputet.
“Kisha pak merak si do ta priste babai. Ai është burrë i mençur, profesor shumë i njohur dhe i djathtë në formim. Nuk e prita të ishte aq mbështetës: …s’po shkon në Komitet Qendror – më tha, po shkon në Kuvend Popullor dhe ky është një vlerësim shumë i madh i kryeministrit për ty”. /tesheshi.com/
