Selia blu nuk ka shpallur asnjë axhendë përfundimtare për mitungun e nesërm, por në ambientet e saj është zhvilluar një mbledhje e pazakontë për të përgatitur protestën të cilën Lulzim Basha e ka shpallur si “pa kthim”.
Pjesëmarrës në të kanë qenë oficerë me grada të larta policie që kanë shërbyer gjatë qeverisjes 9-vjeçare të Sali Berishës.
Pas mbledhjes së kryesuar nga Sekretari i Përgjithshëm Arben Ristani, ish-zv.ministër i Brendshëm, kanë dalë me radhë ish-drejtori i Policisë së Shtetit, Hysni Burgaj; ish-zv-drejtori Agron Kuliçaj; ish-numri dy i policisë së Tiranës, Erzen Breçani; ish-drejtori i Policisë Rrugore dhe asaj bashkiake, Vullnet Topalli dhe të tjerë.
Vendimet apo zhvillimet e kësaj mbledhjeje nuk janë ndarë për publikun. Por siç mësohet ata kanë diskutuar në lidhje me mbarëvajtjen e tubimit demokrat.
Por ç’duan ish-policët me planin e protestës?! Në fakt, një gjë të ngjashme e ka bërë edhe PS-ja kur ishte në opozitë.
Policia
Policia e Tiranës ka paralajmëruar incidente në protestën e opozitës që do të zhvillohet nesër.
Burime policore bëjnë të ditur se gjatë protestës së opozitës ditën e martë mund të qëllohet me gurë dhe vezë në drejtim të godinës së Kryeministrisë dhe forcave policore.
Nga ana e saj, policia ka marrë masat për protestën duke angazhuar një numër të madh forcash.
Kordoni i parë i ruajtjes së sigurisë do të jetë nga policet femra; një mënyrë e zgjedhur prej kohësh kjo nga Ministria e Brendshme për të zbutur sa më shumë përplasjet fizike midis protestuesve dhe policisë.
Ndërkohë, që në gatishmëri janë edhe të gjitha forcat e Ndërhyrjes së Shpejtë. Disa dhjetëra efektivë të komisariateve të Tiranës do të jenë në segmentin sheshi “Skënderbej” – bulevardi “Dëshmorët e Kombit” dhe sheshin “Nënë Tereza.”
Burimet policore kanë deklaruar se pavarësisht informacioneve të marra, kanë çdo gjë nën kontroll për të siguruar marshimin-protestë të opozitës gjatë së martës në bulevardin kryesor, i cili është parashikuar të qëndrojë i mbyllur nga ora 11 deri në 6.00.
Në kuadër të këtyre masave, policia e Tiranës njoftoi kufizimin e pjesshëm të qarkullimit të automjeteve në bulevardin Zogu i Parë, në rrugën e Kavajës, atë të Elbasanit dhe bulevardin “Bajram Curri”.
Në njoftimin zyrtar thuhet gjithashtu se, ndalohet parkimi dhe qarkullimi i të gjitha kategorive të mjeteve, nga sheshi “Skenderbej”, përgjatë bulevardit “Dëshmorët e Kombit”, deri në sheshin “Nënë Tereza”, nga ora 10.00 deri në16.00. /tesheshi.com/
