Ish-drejtori i Agjencisë Qendrore të Inteligjencës Amerikane (CIA) David Petraeus paralajmëroi vendet perëndimore të zgjohen sepse presidenti rus Vladimir Putin “do të hyjë në luftë me NATO-n nëse fiton luftën në Ukrainë”.
“Ai ishte shumë i qartë dhe mendoj se është e qartë, duke parë prapa, se ne duhet ta kishim dëgjuar atë individ (Putin). Ai na tregon atë që beson”, tha Petraeus në një intervistë për The Sun.
“Për të mposhtur Putinin,” vuri në dukje Petraeus, “Perëndimi duhet të bëjë gjithçka që është e mundur për të ndihmuar Ukrainën.”
“Lufta e Ukrainës mund të përhapet në rajon nëse Putini ka sukses në Ukrainë. Ai nuk do të kënaqet të ndalet në Ukrainë. Moldavia padyshim do të ishte synimi dhe pas kësaj mund të jetë Lituania ose një nga shtetet baltike,” tha Petraeus.
Progresi teknologjik
Ai vlerësoi se çelësi i fitores së Ukrainës është rritja e shpejtë e numrit të trupave dhe fuqisë ushtarake me ndihmën e aleatëve të saj perëndimorë.
“Realiteti është i vështirë dhe kjo është një arsye shtesë pse ne duhet të bëjmë gjithçka që mundemi për të ndihmuar Ukrainën në çdo mënyrë të mundshme”, tha Petraeus.
Ai shtoi se Ukraina duhet gjithashtu të bëjë përparime të mëdha teknologjike, duke kujtuar suksesin e saj në mposhtjen e flotës ruse në Detin e Zi.
“Kini parasysh se ata (ukrainasit) bënë atë që bënë në Detin e Zi, jo me ndihmën e anijeve apo marinarëve, por me dronë. Dronët detarë, dronët ajrore dhe raketat kundër anijeve i lejuan ata të fundosnin një të tretën e flotës në Detin e Zi”, tha Petraeus. /tesheshi.com/
