Një nga drejtuesit e Lëvizjes Studentore të vitit 1990, profesori i Universitetit të Nju Jorkut, Shinasi Rama, ka paralajmëruar lindjen e një lëvizje politike intelektuale që do të jetë alternativë e klasës politike shqiptare.
Në një intervistë të dhënë për TCH, profesor Rama deklaroi se vendi është në degradim moral dhe e gjithë energjia është kthyer në luks, llaç dhe kumar.
“Ne tani mund të themi se kemi një masë të madhe njerëzish, rreth 250 mijë apo 300 mijë që jetojnë mirë, kemi rreth 4 përqind të popullsisë që ka mbledhur një pasuri që nuk e di ku e ka. Por, nga ana tjetër e kemi kthyer të gjithë këtë investim të jashtëzakonshëm, 140 miliardë dollarë që kanë hyrë në Shqipëri, i kemi kthyer në tulla e në llaç, në kumar, i kemi vënë në investime që nuk kanë asnjë vlerë, në pompa benzine, në karrige restorantesh, hotele, motele. Ky vend aktualisht gjendet në një krizë të thellë morale, shoqërore, të vlerave dhe tashmë pas humbjes së burimeve që vinin nga emigrantët jemi të zhytur deri në fyt në borxhe të huaja; jemi një vend, i cili është në prag të kolapsit politik; me një sistem drejtësie që nuk funksionon; me një shoqëri e cila është e paralizuar dhe kjo gjendje është thellësisht tragjike. Në vitin 1990 ne kishim një shpresë të madhe e të gjitha shtresave në shoqërinë shqiptare”, tha Rama, i cili së bashku me disa të tjerë ka krijuar një “rreth intelektual”, i cili fabrikon dhe diskuton mbi ide të ndryshme për transformimin e vendit.
“Lëvizja duhet të lindi këtu. Janë shqiptarët, të cilët jetojnë këtu dhe duhet të ngrihen e të kërkojnë ndryshimin e sistemit”, tha Shinasi Rama. /tesheshi.com/
