Vazhdojnë reagimet e maqedonasve, sidomos segmenteve të politikës, ndaj Platformës Shqiptare që u gatua në Tiranë e që po shndërrohet në një “kockë e mbetur në fyt” për palën maqedonase.
E ndërsa LSDM po tenton të rivjen në pushtet nëpërmjet aleancës me shqiptarët duke u treguar luajale ndaj kërkesave të këtyre të fundit, formësuar në Platformë, ish-deputetja e kësaj force politike, Sollza Gërçeva, nuk është aspak dakort. Ajo, platformën e faktorit shqiptar quan një “patate të nxehtë”, e që sipas saj nuk duhet pranuar nga Zoran Zaevi. Gërçeva mbron idenë se çështja etnike ka qenë e panevojshme në fushatën zgjedhore dhe vetëm ka nxitur partitë politike kundër njëra-tjetrës.
“Tani nuk mund askush të dalë në anë të kësaj platforme, ajo tani është një patate e nxehtë dhe në këtë situatë është shumë e rrezikshme. Zaevi nuk duhet ta pranojë atë. Tani duhet të lihen inatet dhe të diskutohet për kërkesat e saj, në mënyrë që sa më shpejt të formohet qeveria, e cila duhet të fokusohet në reforma dhe jo në çështjet të cilat na kthejnë në vitet e 90-të të shekullit të kaluar. Mendoj se kjo platformë është jashtë Marrëveshjes së Ohrit”, ka deklaruar Gërçeva në një emision të TV21. /tesheshi.com/
