Ish-deputetja e BDI-së, Ermira Mehmeti, e ftuar në emisionin “200” të tvAlsat, është shprehur skeptike se me Gruevskin kryeministër, të mund reformohet sistemi shtetëror.
“Nga një kryeministër që ka bërë aq nam përgjimesh është absurde që të presim ai të reformojë sistemin. Nuk mundet, sepse ai e ka vendosur atë sistem. Ai sistem e ka prodhuar atë lider. Si mund të presim tani që ai ta pranojë përgjegjësinë dhe të korrigjojë atë”, tha Mehmeti, partia e së cilës deri dje, BDI-ja, ka qenë aleate e ngushtë e VMRO-së. Por dhe atëherë, kur Mehmeti ishte aktive në rradhët e grupimit politik të Ali Ahmetit, derisa doli përfundimisht prej tij, shprehte rezerva ndaj pushtetit të tyre, dhe sidomos ndaj Gruevskit.
Kujtojmë se në ndërkohë, pas dështimit të këtij të fundit të formuar një kabinet të ri pas-zgjedhor, është LSDM ajo që është angazhuar në bisedime dhe tratativa për ta marrë në dorë qeverisjen. Kreu i saj, Zoran Zaev, po zhvillon bisedime të ethshme me faktorin shqiptar, për ta marrë prej tyre nënshkrimet e nevojshme që më pas presidenti t’i japë mandatin, ashtu siç ia ka premtuar, nëse do sigurojë 60 firma. /tesheshi.com/
