Ish-deputeti i PDK-së, Shukri Buja, i cili dha dorëheqje ditë më parë nga posti i kryetarit të PDK-së në Lipjan, sot do t’i bashkohet partisë së Fatmir Limajt.
I kontaktuar nga portali tesheshi.com, Buja ka konfirmuar se do t’i bashkohet NISMA-s.
“Sot në orën 14:00 do të mbahet një konferencë për media dhe aty do të shihni pozicionimin tim të ri politik”, ka thënë Buja.
Ndonëse nuk ka thënë se do të kandidojë për kryetar të Lipjanit nga radhët e NISMA-s, sipas të gjitha gjasave një gjë e tillë pritet të ndodhë, pasi ai ka pasur përkrahje të Degës së PDK-së të kandidojë, por që nuk ka marrë “PO”-në edhe të Veselit për çka më pas ka prishur raportet me ish-partinë e tij.
Buja për një kohë të gjatë ishte pjesë e PDK-së. Në mandatin e kaluar ishte ndër deputetët më të zëshëm, i cili kërkonte që vendi të shkojë në zgjedhje të parakohshme. /tesheshi.com/
