Ish-deputeti i LDK-së, njëherësh kundërshtari më i madh i Demarkacionit me Malin e Zi, Shpejtim Bulliqi, i ka dalur kundër sërish kreut të partisë, Isa Mustafa, pas prezantimit të disa kandidatëve për kryetar komunash.
Bulliqi në një postim në rrjetin social Facebook shkruan se rikandidimi i tyre është edhe një dëshmi më tepër se në strukturat udhëheqëse qendrore të LDK-së është instaluar një vendimmarrje centraliste e tipit komunist.
“Përmes mediave u mësua se kryesia/klani që e ka kapur LDK-në i paska nominuar kandidatët për kryetar në disa komuna. Për ta thënë troç, kryesia/klani humbës sistematik i katër palë zgjedhjeve e paskan nominuar vetveten si kandidatë për kryetarë komunash, gjë që mendoj që përveç shkeljeve statutore, në vend që propozimet të merren nga baza ku do të votohet, ata këtë punë e paskan bërë vetë. Këto propozime sot për herë të parë në historikun e LDK-së i paska bërë niveli qendror duke mospërfillur se paku propozimet e strukturave në nivel degësh siç na ishte rendi dhe praktika.
NË vend që këto struktura të japin llogari për humbjet e njëpasnjëshme që i shkaktuan LDK-së për këto vite, disa prej tyre e paskan nominuar vetveten kjo edhe për faktin që disa nga ata tanimë janë harxhuar/konsumuar aq shumë, dhe nuk besoj se kanë çfarë t’i japin më qytetarëve dhe komunave ku do të rikandidojnë. Me këto veprime të tyre përveç që po ju mbyllin derën kuadrove të reja, të respektuar, të cilët do të rikthenin besimin e elektoratit të LDK-së, besim të cilin ia humbën pikërisht këta individë, sot këta të njëjtit fatkeqësisht i paskan bërë edhe njëherë me dije elektoratit, që mendojnë vetëm për vetveten dhe kolltukun e tyre”, ka shkruar Bulliqi. /tesheshi.com/
