Ish-deputeti Alqi Bllako është mbrojtur rëndshëm ndaj akuzave të SPAK për të, mbi aferën e Inceneratorëve, duke e sulmuar ashpër instancën e “pamëshirshme” hetuese e cila e çoi pas hekurave.
Në një seancë të konkluzioneve të mbrojtjes, Bllako aludoi dhe për injorancë juridike nga ana e SPAK.
Sipas tij, “shkelja e ligjit është aq flagrante se nuk di nëse ka të bëjë me injorancën profesionale apo një hakmarrje personale. Vetëm SPAK mund të akuzojë për një detyrë që nuk ka qenë detyra ime. Standard i hapur esktraligjor, duke çuar përpara një agjendë hakmarrjeje personale ndaj personit tim“, tha Bllako.
Ish-deputeti tha se nuk ka qenë zyrtar i lartë publik, por funksionar i lartë civil.
“Kush konsiderohet funksionar i lartë shtetëror e përcakton Kushtetuta. E ftova prokurorin në seancën paraprake të citonte një ligj të vetëm se ku bazohet, nuk dha sqarime sepse diçka e tillë nuk ekziston. Është njësoj si gjykata të çojë për gjykim çështjen me akuzën shpërdorim detyre, ndërsa në konkluzionet përfundimtare prokuroria të ngrejë akuzën vrasje me paramendim. Është haptazi shpërdorimi i prokurorit, me qëllim hakmarrjen personale”, ishte arsyetimi i ish-deputetit.
Bllako paralajmëroi se çështjen e tij do e çonte deri në Strasburg
“Një shkelje e tillë jo vetëm do ankimohet në KLP, por deri në Strasburg”. /tesheshi.com/
