Ish-anëtari i PDK-së, tani i Lëvizjes Vetëvendosje, Xhavit Drenori, i ka bërë thirrje ish-shefit të tij, Kadri Veselit që të mos bllokojë krijimin e qeverisë nga Albin Kurti.
Në një status në Facebook, Drenori ka shkruar se Veseli është humbësi më i madh i zgjedhjeve të 11 qershorit, pasi përveç humbjes së PAN-it, humbës përball Kurtit ishte edhe Veseli.
“Kadri lësho udhë! Lajmet që po lexojmë se PDK-ja ka fituar 20 mandate në Parlamentin e Republikës së Kosovës, përderisa në legjislaturen e kaluar mbante plot 36 sosh, është treguesi më i mirë që je humbësi më i madh i zgjedhjeve të 11 Qershorit. Informacionet se Albin Kurti është kandidati larg më i votuar se Ti, sado që të dy mbanit numrin 1 në lista zgjedhore, madje distanca ndërmjet Jush është jashtzakonisht e madhe, 188000 për Albinin kundrejt rreth 60000 votave për Ty, është tregues tjetër që duhet të lëshosh rrugë.
Bëhu burrë dhe largohu me gjithë mandatet e fituara (tmerrësisht të tkurrura) në opozitë. Liroj rrugë hetimit të organizatës që e udhehoqe me dekada (SHIK-un) dhe kurrë qytetarët nuk u informuan për punën e saj. Liroj rrugë çkapjes së institucioneve publike, gjyqësorit, bordeve publike, universiteteve etj. Shko dhe reformoje partinë se ‘era’ e krimit dhe korrupsionit po i vije gjithandej”, ka shkruar Drenori.
Ai më tej thotë se Kadria ka dy rrugë para vetes:
“Të liron rrugë duke e pranuar që i humbi zgjedhjet dhe në një farë forme e bën me pak burrëri duke ju dëshmuar qytetarëve se forcimi dhe konsolidimi i demokracisë në Kosovë qendron mbi apetitin për ta mbajtur me çdo kusht pushtetin që tashme u dëshmua që me shokët e tu e keqpërdorët skajshmërisht, dhe/ose të na dërgosh edhe njëherë në zgjedhje dhe të tkurrësh edhe më shumë dhe të detyrohesh kokë ulur të ikësh përfundimisht ndoshta edhe nga skena politike Pra, Kadri shko!, sepse kështu deshi sovrani.
Nëse shkon tani, ndoshta edhe mund të kthehesh. Nëse e bën të kundërtën, vështirë që do të kthehesh”, ka shkruar Drenori. /tesheshi.com/
