Shpëtim Çuçka, diplomat karriere, ish-ambasador në Beograd, ka cituar William Walkerin – njeriu që ia shfaqi botës masakrën e Reçakut – të ketë thënë për Hashim Thaçin se “i ka kaluar koha”. “Si mund të thuash për një president në detyrë që i ka kaluar koha?”, pyeti në mënyrë retorike Çuçka, duke vijuar më pas të thotë se këta janë sinjale të qendrave të influencës që duhen marrë në konsideratë nga ata që u drejtohen.
Këtë, diplomati i njohur shqiptar e tha ndërsa po analizonte arrestimin e Haradinajt me urdhër-arrest serb, i ftuar në emisionin e mëngjesit në Vizion Plus.
Edhe këtë zhvillim me në qendër kreun e AAK-së që aspiron fort për t’u kthyer në qeveri, Çuçka e intepretoi si një mesazh që ai, por dhe Thaçi, referuar thënies së Walkerit për të, duhet ta marrin si fundin e mbështetjes ndaj tyre nga faktori ndërkombëtar. Pra më troç, si një moment kur duhet të tërhiqen nga politika.
Sa për trenin serb, diplomati Çuçka tha se para se ai të ndalohej me forca speciale, pra duke bërë një demostrim force, do ishte mirë që të aktivizohej një komunikim dypalësh. Ndërsa për parrullën në tren “Kosova është Serbi”, ai tha se kjo është diçka normale për serbët dhe se vështirë që ndonjë pushtet a udhëheqje serbe nuk do e mbrojë këtë një ditë. Madje ai ironizoi politikën e Prishtinës kur lëshon fraza të tilla si “Serbia nuk po na ndihmon në të bëjmë shtet, por po na pengon”(!). Çuçka tha se Serbia nuk ka sesi ta ndihmojë Kosovën që të bëhet shtet. /tesheshi.com/
