Kreu i LDK-së, Isa Mustafa, ka vazhduar akuzat ndaj koalicionit PDK-AAK-NISMA duke thënë se po mundohen të bëjnë 61 vota për formimin e qeverisë me anë të kontrabandistëve e matrapazëve. Me gjasë, ky reagim u është drejtuar Dardan Gashit (ish-ministër i Mjedisit) dhe Astritë Haraqisë (ish-ministër i Kulturës), pasi që të dytë janë duke kontribuuar që deputetë të LDK-së ta votojnë Haradinajn për kryeministër dhe kjo u pa dje me rastin e Teuta Rugovës.
“Institucionet e shtetit duhet të ndërtohen, por jo me matrapazë. Matrapazët e kontraktuar po duan me ia shitë opinionit qeverinë e PAN-it, në paketimin e AAK-së dhe të miqve të Ibrahim Rugovës. Do të jetë i mjerë ai shtet, ajo qeveri, ajo parti dhe ajo derë që lejon që dy matrapazë t’ia bëjnë politikat, të kontrabandojnë votat dhe të flasin për rugovizmin dhe rugovistët”, ka deklaruar Mustafa.
Tutje ai thotë se matrapazët i shkelin të gjitha vlerat morale dhe etike, por bëb të ditur se ata LDK-ja i qet si trup të huaj.
“Prandaj është e qartë, ata që janë me matrapazët nuk janë me LDK-në. Manipulues dhe kalkulatntë të llojit të vet i konsideroj edhe ata individ të LDK-së që kërcënojnë se do të dalin në rrugë nëse mandati nuk i jepet një partie tjetër, e të cilët kurrë nuk e bënë ndonjë deklaratë të tillë për rastin nëse nuk do ti jepej mandati LDK-së, ose kur njerëzit e LDK-së sulmoheshin dhe atakoheshin në mënyrën më shtazarake”, thotë Mustafa.
Ai më tej sërish ka shprehur kundërshtinë për koalicion me PDK-në.
“Anëtarësia jonë, votuesit e koalicionit tonë, organet e LDK-së janë shprehur qartë: Jo koalicion me PDK-në dhe me ata që janë me PDK-në. Jo koalicion me ata që shkelin kontratat dhe rrezikojnë interesat e shtetit për ambicie dhe interesa të tyre personale e grupore. Jo me ata që nuk durojnë sukseset në zhvillim ekonomik, punësim, në luftë kundër krimit dhe korrupsionit dhe kapjes së shtetit”, ka thënë Mustafa.
Ai ka ripërsëritur se nuk kanë pasur asnjë kërkesë nga ndërkombëtarët të për të bërë koalicion qeverisës, qoftë me PAN apo VV.
“Por edhe nëse do të kem, do ta refuzoj me arsye të plotë çdo kërkesë për të bërë marrëveshje qeverisëse me koalicionin që drejtohet nga PDK-ja. Këtë ua kam bërë të njohur përfaqësuesve të BE-së dhe të SHBA-së me kohë, para se të votohet mocioni i mosbesimit. Deputetët e LDK-së dhe partnerët tanë të koalicionit nga AKR dhe Alternativa janë shprehur qartë se do të jemi së bashku në këto qëndrime”, ka pohuar Mustafa.
