Kryeministri i Kosovës, Isa Mustafa dhe homologu i tij malazes, Dushko Markoviç janë takuar këtë të dielë në Shkodër, në një nga hotelet e këtij qyteti. Zyrtarisht nuk është dhënë asnjë njoftim për tematikën e bisedës mes tyre.
Por kur është fjala për një takim mes krerëve të qeverive të Kosovës dhe Malit të Zi, Demarkacioni konsiderihet si çështje kryesore e trajtuar. Përgjithësisht, Mali i Zi me Kosovën nuk kanë asnjë mosmarrëveshje veç vijës kufitare, e cila ka marrë dakortësinë e palëve që para dy vitesh në Bruksel.
Mali i Zi është në pritje të ratifikimit në Kuvendin e Kosovës, po ashtu dhe Brukseli, i cili e ka vënë si kusht për liberalizimin e vizave, por Isa Mustafa dhe qeveria e tij nuk ka ende votat e duhura për ta kaluar, pavarësisht presioneve politike nga ana e opozitës dhe e oponionit kosovar. /tesheshi.com/
