Kreu i LDK-së Isa Mustafa sulmoi Kushtetuesen e Kosovës pas verdiktit të saj që, për shkak të votës së deputetit Etem Arifi, qeveria “Hoti” konsiderohet ilegjitime, e kësisoj Kosova duhet të shkojë në zgjedhje të parakohshme brenda 40 ditësh.
“Ne nuk kemi pritur fare që Gjykata Kushtetuese do të dalë me një vendim të tillë, sepse janë marrë masa dhe nuk është alarmuar ligjshmëri me kohë ndaj deputetit Etem Arifaj.
Ai është zgjedhur deputet në këtë mandat.
Vepra për të cilën është dënuar ai i takon legjislacionit të kaluar dhe rrjedhimisht ai ka bërë mandatin në legjislacionin e kaluar. Ai ka marrë pjesë dhe ka votuar për të gjitha organet që kanë dalë nga zgjedhjet e 6 tetorit të vitit të kaluar edhe për Kuvendin edhe për Kryesinë e Kuvendit edhe për qeverinë ‘Hoti’ dhe qeverinë ‘Kurti’ dhe askush nuk e ka sinjalizuar se ai nuk ka të drejtë ta bëjë këtë. Dhe tash është çështja vetëm te votimi i qeverisë ‘Hoti’”, argumentoi Mustafa.
Dhe sipas tij, nuk mund të jetë Kushtetuesja ajo që shpall zgjedhje të parakohshme.
“Nuk është në mandatin as në rolin e Gjykatës Kushtetuese që t’i shpallë zgjedhjet. Ajo mund të konstatojë në aktgjykim dobësitë ose lëshimet ligjore të cilat kanë ndodhur, por nuk është ajo që i shpallë zgjedhjet. Unë mendoj që nuk ka qenë as i drejtë dhe as profesional”, tha Mustafa, që gjithsesi shtoi se do e respektojë vendimin.
”Por unë nuk e kontestojë tani vendimin si të tillë sepse ne jemi shprehur si LDK që do ta pranojmë vendimin dhe do të sillemi sipas këtij vendimi.
Por unë mendoj se vendimet e tilla nuk i bëjnë mirë vendit sepse asnjë gjykatë në Kosovë nuk duhet të dalë dhe të sillet si organ suprem i shtetit të Kosovës dhe ai pastaj ndan drejtësinë sepse është Kushtetuta që i ka përcaktuar rregullat e sjelljes dhe nuk mundet Gjykata Kushtetuese në çdo rast të shkruaj pjesë të Kushtetutës ashtu siç po ndodh tek ne”, theksoi Mustafa. /tesheshi.com/
