Ndërsa Komuna e Mitrovicës së Jugut që udhëhiqet nga Agim Bahtiri, pritet të mbajë një seancë të jashtëzakonshme për murin që është ndërtuar në veri, tek ura kryesore e Ibrit, kryeministri Isa Mustafa, ka thënë sot se do të hiqet, pra deklaratë e njëjtë siç bëri ditë më parë kryenegociatorja Edita Tahiri në një intervistë dhënë për tesheshi.com.
“Muri është jashtë projektit dhe marrëveshjes së Brukselit”, ka thënë kryeministri në Gjilan kur është pyetur nga mediat, por që nuk ka dhënë ndonjë datë se kur mund të ndodhë një gjë e tillë.
Megjithatë, përtej këtyre deklarimeve qeveritare, muri në veri vazhdon të mbetet në këmbë dhe nëse nuk ndërmerret ndonjë veprim për ta rrënuar atë, sigurisht ai nuk mund të rrëzohet me fjalë.
Për këtë çështje opozita kosovare ka kërkuar seancë të jashtëzakonshme plenare por që minsitrja Tahiri ka thënë se nuk ka arsye të mbahet një e tillë pasi muri do largohet më herët, ndërsa anëtarët e komisionit kuvendar për punë të jashtme kanë shprehur shqetësimin e tyre për ndëritmin e murit, duke thënë se si është e mundur që qeveria të mos jetë në dijeni për ndërtimin e tij.
Ndërsa, deputetja e PDK-së Sala Berisha-Shala, në një intervistë dhënë për mediat kosovare ka lënë fajtor konkretisht kryeministrin Isa Mustafa, duke thënë se po të kishte kryeminsitrin PDK, muri nuk do të ndërtohej. /tesheshi.com/
