Mes shumë kritikave dhe pakënaqësive të brendshme, Isa Mustafa është rizgjedhur për të tretën herë rresht në krye të LDK-së, parti historike e themeluar nga elita kulturore kosovare e viteve ’80-’90, dhe e drejtuar nga ish-presidenti Rugova.
Mustafa morri shumicën e votave në Kuvendin e partisë, duke thënë: “Jemi shpresëplotë se LDK-ja po shfaq energji, veprim politik të koordinuar mirë dhe në bashkëpunim të plotë me anëtarësinë dhe qytetarët. Ka ardhë koha ta marrim përgjegjësinë për Kosovën dhe t’i sjellim ndryshimet që Kosova ka nevojë”.
Por nga ana tjetër, një tjetër figurë e njohur e kësaj force, ish-presidenti Fatmir Sejdiu, pretendent për kreun e saj, tha se delegatët janë kërcënuar që të mos e votojnë kandidaturën e tij.
“Ata njerëz nuk mund të shprehen lirshëm. Nuk kanë miratuar kandidaturën time, e kanë miratuar një tjetër. Në këtë mënyrë të punës, me këtë qasje, me këtë mënyrë të mungesës së guximit të njerëzve, e kemi një shenjë të keqe për demokracinë ne Kosovë. LDK ka qenë dhe mbetet shtëpia ime”, tha Sejdiu.
Ka patur një reagim dhe nga jashtë LDK-së, prej një ish-themeluesi të saj, Milazim Krasniqit, i cili shkroi duke publikuar një foto të vetes vite më parë në një prej organizimeve partiake: “Duke mbajtur fjalë në Kuvendin e parë të LDK-së, më saktë duke iu kundërvënë komplotit stalinist që u shfaq si lugat në punimet e tij dhe që nuk u ndal deri sa e shfytyroi keqas. Pasojat e atij komploti i vuan LDK-ja edhe sot”. /tesheshi.com/
