Kryeministri i Kosovës, Isa Mustafa, pas akuzave të njëpasnjëshme ndaj opozitës se po bllokon liberalizimin e vizave për qytetarët, ka artikuluar akuza të njëjta për Bashkimin Evropian, duke e quajtur kushtin për ratifikimin e Demarkacionit si të pakuptimtë.
Por Mustafa nuk ka lënë pa e thumbuar edhe opozitën, duke thënë se kauza e tyre është politike e dhe e paqëndrueshme.
“Aspiratat tona për t’u anëtarësuar në BE duhet t’i përmbushim me veprime dhe vendime të mëdha dhe të guximshme. Kosova ka nevojë të jetë në tregun e BE-së; këtë e mundëson MSA-ja. Kosova ka nevojë për dije evropiane; këtë e mundëson liberalizimi i vizave. Kosova ka nevojë për lëvizje të lirë të mallrave; këtë e mundëson liberalizimi i vizave (ndryshe mallrat nuk mund të lëvizin pa njerëz). Kosova ka nevojë për lëvizje të ndërmarrësisë; edhe këtë e mundëson liberalizimi i vizave. Jemi bllokuar nga BE me një kusht të pakuptimtë, ashtu siç jemi bllokuar nga vetvetja me një kauzë politike të paqëndrueshme, por edhe të dëmshme, për perspektivën e vendit. Në një formë, ne mund t’i kuptojmë paragjykimet e disa burokratëve evropianë në përcaktimin e kushteve që nuk ua kanë përcaktuar të tjerëve, por duhet të gjejmë forcë të tejkalojmë vetveten për të qarë rrugën evropiane, atë të perspektivës ekonomike dhe kulturore,” ka shkruar Mustafa në Facebook.
Ai thotë se, pavarësisht pengesave, duhet arritur liberalizimi dhe anëtarësimi në BE.
“Ne duhet të arrijmë atje ku e kemi qëllimin, pa marrë parasysh se kjo rrugë nuk është pa pengesa. Fundja, rrugë tjetër nuk kemi, prandaj çdo vonesë na dëmton. Pa pjesëmarrje të mirëfilltë në tregun evropian nuk ka zhvillim ekonomik, çfarë neve na nevojitet,” shton kryeministri në rrjetin social. /tesheshi.com/
