Dhe pse kanë kaluar tre ditë nga deklaratat e kreut të PDK-së, Kadri Veseli ku kritikoi qeverisjen e Isa Mustafës dhe tha se zgjedhjet mund të jenë një opsion për të lënë pas krizën politike, kryeministri dhe kreu i LDK-së vazhdon të heshtë.
Për më tepër, ai, duke mos pasur guximin t’i kundërpërgjigjet Veselit, ka ngacmuar sërish opozitën duke thënë se Asociacioni dhe Demarkacioni do të kryhen.
“Kemi pasur protesta të dhunshme por kemi arrit t’i tejkalojmë. Asociacioni do të themelohet, ndërkaq sa i përket demarkacionit, Qeveria është e bindur që e kemi ruajtur territorin e Kosovës dhe s’kemi humbur asnjë metër katror, përkundër asaj që opozita thotë se po humbim territor”, tha ai, sot në seminarit “Rose Roth” të Asamblesë Parlamentare të NATO-s që po mbahet në Prishtinë.
Mustafa, me heshtjen e tij konfirmon atë që pothuajse çdo ditë e thonë opozita dhe analistët politikë në vend, se dëshirë e kreut të LDK-së është qëndrimi me çdo kusht në pushtet, kurse është në dorën e PDK-së dhe Kadri Veselit se kur do të mbahen zgjedhjet e reja, pra njëherit ta rrëzojë Mustafën. /tesheshi.com/
