Kryeministri Isa Mustafa konfirmon se ende nuk ka një zgjidhje të pranueshme sesi do të mund të themelohen Forcat e Armatosura të Kosovës, pas kundërshtisë nga lista Serbe. Ai në një postim në Facebook bën fajtore pikërisht listën Serbe, edhe pse thotë se nuk është penduar që këmbënguli për të mos lejuar vende të rezervuara në Kuvend për pakicat në këmbim të themelimit të ushtrisë.
“Sa i përket transformimit të FSK-së në Forcë të Armatosur, për mua ka qenë dhe është e pajustifikueshme që të ndërlidhet me kontekstin e vazhdimit të vendeve të rezervuara. Sepse këto vende nuk mund të afatizohen. Ajo që ndryshohet në Kushtetutë me dy të tretat, nuk mund të ndryshojë në të ardhmen pa të njëjtin parim. Së fundmi kjo do të na shtynte në një cikël të kushtëzimeve, nga i cili vështirë se do të gjenim rrugëdalje”, shkruan Mustafa.
Ai thotë se është duke punuar për gjetjen e një zgjidhjeje që do të lejonte shndërrimin e FSK në ushtri të Kosovës, duke treguar se vetëm në dhjetët ditët e fundit ka pasur pesë takime me partnerët e koalicionit dhe faktorin ndërkombëtar.
“Ne do të punojmë shumë për avancimin e të drejtave të popullatës joshumicë në vendin tonë, dhe jemi kampionë në ofrimin e këtyre të drejtave, por Forcat e Armatosura janë forcë e të gjithë qytetarëve tanë, prandaj pres bashkëpunim dhe marrje të përgjegjësive edhe nga përfaqësuesit e partive joshumicë në Kuvend”, përfundon Mustafa. /tesheshi.com/
