Isa Mustafa, partneri në koalicion i Albin Kurtit, ka përcjellë një tjetër mesazh të radhës se pse taksa duhet të hiqet, menjëherë e jo e pjesshme.
“Që nga fillimi jam shprehur haptas, ndoshta ndër të vetmit, se tarifa së pari 10 përqind e pastaj 100 përqind, e caktuar nga Qeveria Haradinaj, nuk kishte arsyetim ekonomik por ishte vënë për tu mbrojtur nga dështimet, sidomos në politikën e jashtme”, e nis një mesazh të tij Isa Mustafa.
Për më tepër, edhe ai si Rama, nuk beson te teza e Haradinajt, se mbajtja e taksës do sjellë njohjen e Kosovës.
“Askujt nuk i mbushet mendja se Kosova e detyron Serbinë që ta njohë përmes tarifës.
Por, shumicës dërmuese iu mbushet mendja se SHBA-të, në rend të parë, dhe BE mund ta bindin Serbinë, përmes procesit të dialogut, ta njohë shtetin e Kosovës”, shkruan Mustafa.
Kreu i LDK-së nxit që taksa të hiqet menjëherë.
“Dëshiroj të besoj se mbledhja e nesërme e Kuvendit do t’i japë përkrahje Qeverisë dhe Kryeministrit Kurti të hiqet tarifa.
Të hiqet ashtu siç po kërkojnë SHBA-të.
Nuk jam i sigurt që dikush nga grupet parlamentare ose deputetët e Kuvendit apo qeveritarët ta kenë gjetur një partner më të fortë, më meritor dhe më të përkushtuar sesa SHBA-të për shtetin dhe shtetësinë e Kosovës”, shkruan ndër të tjera Isa Mustafa. /tesheshi.com/
