Nga Blendi Gashi
Kryeministri Isa Mustafa, i gjendur prej kohësh në një situatë tejet të palakmueshme, i goditur nga protestat e opozitës dhe bojkoti i Listës Serbe, edhe zyrtarisht ka kërkuar ndihmë nga BE për të çuar përpara marrëveshjen për Demarkacionin me Malin e Zi dhe Asociacionin e Komunave me shumicë serbe.
Siç dihet, për të parën prej më shumë se një viti po ballafaqohet me kundërshtimin e ashpër të partive opozitare, për çka edhe sot opozitarët pas takimit që zhvilluan me përfaqësuesen e BE-së, Mogherinin, bën të qartë se nuk lëvizin nga qëndrimet dhe do e kundërshtojnë fuqishëm.
Kurse për të dytën, Mustafa nga muaji nëntor i vitit të kaluar është braktisur nga partneri i koalicionit “Srpska”, e cila ia ka bërë të qartë se nuk kthehet në institucione pa u themeluar Asosacioni, por në mënyrën si ata duan.
Mustafa si kryeministër që udhëheq një koalicion të shumicës por që ka mungesë të përkrahjes edhe nga partia e tij, pasi deputet të caktuar të LDK-së kanë paralajmëruar votën kundër Demarkacionit, po tenton që përmes BE-së të ndikojë tek kundërshtarët dhe të miratojë dy marrëveshjet e lartcekura, që nënkuptojnë njëkohësisht shpëtimin e tij politik, pra mosrënien e qeverisë, dhe njëherit triumfin ndaj opozitës.
Mogherini mund të thuhet se ia bëri një argat Mustafës me uljen në tryezë të gjithë përafqësuesve politik, dhe me deklarimin e saj të qartë se Demarkacioni është kushti i vetëm për liberalizim, pasi ka progress në luftën anti-korrupsion.
Por, siç duket kjo po del të jetë e pamjaftueshme duke parë këmbënguljen e opozitës se marrëveshja e Demarkacionit në versionin aktual nuk kalon pasi e cilësojnë tradhëti ndaj shtetit.
Duke parë mosbindjen e opozitarëve ndaj Mogherinit, mbetet të shihet nëse presioni i BE-së për rikthimin e Listës Serbe në institucuione do ketë sukses, dhe Mustafa të shfrytëzoi votat e serbëve për ta ratifikuar Demarkacionin.
Në të kundërtën, fati i politik i Mustafës lëkundet fort, pasi mosratifikimi i Demarkacionit sipas të gjitha gjasave çon vendin në zgjedhje të parakohëshme dhe njëherit kreun e LDK-së në pension, pasi sondazhet e bëra në vijimësi partinë e tij e nxjerrin si parti të tretë për herë të parë nga paslufta.
Dhe nëse vërtetohet një gjë e tillë pas zgjedhjeve, pra rënia si kurrë më parë e LDK-së, pakënaqësitë ndaj Mustafës si kryetar i LDK-së do rriteshin dhe sipas të gjitha gjasave kundërshtarët e tij partiakë, duke filluar nga ish-kryetari Fatmir Sejdiu, deputetët Vjosa Osmani, Arben Gashi, e zyrtarë të tjerë do e kërkojnë largimin e tij nga kreu i partisë. /tesheshi.com/
