Isa Mustafa, kreu i LDK, për momentin duke u trajtuar nga koronavirusi, ka befasuar me një status të tij, duke ndërhyrë, i pari politikan i lartë kosovar deri më tani, në një debat të këtyre ditëve mbi ndërtimin e një xhamie të madhe në Prishtinë.
Reagimi i Isa Mustafës ka ardhur pas një proteste minore të një grupi individësh, të cilët nuk duan ndërtimin e xhamisë, pasi, siç pretendojnë, ajo investohet nga Turqia për qëllime politike(!), apo se Kosova është tokë iliro-pellazge(!) e të ngjashme si këto.
Për Isa Mustafën, ky nuk është veçse kompleks inferioriteti.
“Miq të nderuar,
Protestat janë pjesë e ekspozimit demokratik. Sikurse, kjo e sotmja kundër ndërtimit të Xhamisë së Madhe në Prishtinë.
Protesta tregon edhe kompleksin e inferioritetit tonë që të pajtohemi se jemi këta që jemi, rreth 95 perqind muslimanë. Por, në vend që të turpërohemi, do duhej të krenohemi, ashtu siç krenohen të gjithë njerëzit e botës për besimin e tyre në Zot, për objektet e tyre monumentale fetare, pa marrë parasysh sesi e demonstrojnë besimin e tyre, si muslimanë, katolikë, ortodoksë, protestantë….
Tendenca që të diktosh besimin dhe objektet fetare, nuk përkon me respektimin tonë të ndërsjell dhe as me respektimin e vetëvetes. Pse duhet të na pengojë një xhami e madhe, një katedrale, një kishë në Prishtinë. Qytetet më të mëdha ua kanë vënë qytetarë të tyre vendet më të mira për xhami, siç është Londra. Është Tirana. Këtë e kam bërë edhe unë sa isha Kryetar i Prishtinës“, shkruan Isa Mustafa, i cili, siç e pohon dhe vetë, është njeriu që dha lejen e ndërtimit në lagjen “Dardania”, në afërsi të PTK.
“E inkurajoj Kryetarin Ahmeti të vazhdojë me ofrimin e zgjidhjes më të mirë për ndërtimin e kësaj xhamie.
Të mundohesh që të paraqitesh ai që nuk je, s’është asgjë më pak sesa primitivizëm”, përfundon njeriu që drejton LDK-në. /tesheshi.com/
