Kreu i LDK-së, Isa Mustafa, në takimin e Këshillit të Përgjithshëm të partisë, mbajtur pasditen e së mërkurës, ka folur për zgjedhjet lokale që do mbahen këtë vit.
Ai duke folur për kandidaturat për kryetarë komunash dhe këshilltarë komunalë, ka deklaruar:
“LDK do të kandidojë personalitete që kanë besimin dhe përkrahjen e plotë të LDK-së, që kenë autoritet dhe përkrahje të qytetarëve, të jenë njerëz me të kaluar të pastër, pa afera korruptive dhe të pa inkriminuar në veprime joligjore”.
“Orientimet programore do të bazohen në projekte konkrete në funksion të zhvillimit ekonomik lokal, ndërtimit të një sistemi arsimor gjithëditor, shëndetësi më të avancuar familjare, qeverisje efektive, politika rinore e sociale, infrastrukturë…”
Kjo deklaratë e Mustafës përveç se të kujton deklarimet e njëjta të Thaçit e Veselit, në vetvete nuk jep kurrfarë risie, pasi pothuajse në çdo zgjedhje bëhen premtime të tilla nga partitë dhe në fund kandidohen njerëz me afera të ndryshme, ndërsa për implementimin e programit dhe premtimet e dhëna gjatë fushatës as që vlen të diskutohet.
Se është një deklaratë jo relevante e tregon më së miri edhe mosdhënia e asnjë emri si kandidat i mundshëm për ndonjë komunë e në veçanti për Prishtinën.
Nga Mustafa elektorati i LDK-së sigurisht pret se kush do jetë kandidati për kryeqytetin, pra kush do sfidojë tashmë kandidatin e zyrtarizuar nga Vetëvendosje, pra kryetarin aktual Shpend Ahmeti.
Por Mustafa as në mbledhjen e mbajtur sot nuk e pati guximin që të jap emrin dhe të thotë “ja ky do jetë kandidati i pastër i LDK-së, pa afera korruptive me të cilin synojmë të rimarrim Prishtinën”.
Mustafa foli vetëm në përgjithësi duke lavdëruar punën e kryetarëve të komunave të LDK-së dhe nuk e përmendi dikur bastionin më të madh të tyre, Prishtinën që e humbi pikërisht ai përballë Shpend Ahmetit.
Ky mosguxim i Mustafës dhe në përgjithësi LDK-së se kush do jetë kandidati i tyre për kryeqytetin, tregon qartë se në këtë parti ka pakënaqësi se kush duhet ta sfidojë Ahmetin, pasi puna e këtij të fundit vlerësohet jo pak nga qytetarët dhe shoqëria civile.
Megjithatë, si kryetar i partisë Mustafa ka edhe më pak se gjashtë muaj kohë të nxjerrë kandidatin për Prishtinën dhe të tregoj para prishtinasve pse duhet zgjedhur kandidati i tyre e jo kundërshtarët tjerë, pra konkretisht ç’do bën LDK për kryeqytetin që nuk arriti të bëjë për 14 vite sa drejtoi atë.
Ndryshe si kandidat të mundshëm për LDK-së përmenden: Arban Abrashi, ministër aktual i Punës; Vlora Dumoshi, shefe e kabinetit të kryeministrit Mustafa; dhe Ismet Beqiri, shef aktual i grupit parlamentar të LDK-së, ish-kryetar i kryeqytetit.
Kujtojmë se zgjedhjet lokale pritet të zhvillohen në muajin tetor të këtij viti, ku LDK-ja synon që sërish ta kthej Prishtinën nën qeverisje, pasi e humbi atë më 2013, për herë të parë nga paslufta.
Shpend Ahmeti nga VV, në raundin e dytë mposhti Isa Mustafën, duke bërë që kështu përfundimisht të thyhet ky bastion i LDK-së. /tesheshi.com/
