Nënkryetari i PDK-së, Hajredin Kuçi, në një emision televiz mbrëmë e ka lënë të hapur mundësinë e shkuarjes në zgjedhje të reja, duke thënë se për këtë do bisedojnë të hënën kryetarët e dy partive të koalicionit dhe do merret vendimi, sipas tij, “në interest të qytetarëve dhe ecjes përpara të shtetit”.
Pavarësisht kërcënimeve të hapura nga partneri i koalicionit, kryeministri Isa Mustafa bën sikur nuk mërzitet për rrëzimin eventual të qeverisë.
Ai përmes një postimi në Facebook ka numëruar sukseset dhe të arriturat e qeverisë që udhëheq, ku ka përmendur rritjen e pensioneve të UÇK-së, por jo vetëm.
“Kjo qeveri rriti deri në 65% pensionet kontributdhënëse dhe 25% asistencën sociale. Kjo qeveri nisi dhënien e pensioneve për veteranët e UÇK-së, çështje e premtuar dhe e zvarritur 15 vjet. Përfunduam përgatitjet dhe fillojmë me sigurimet shëndetësore nga 1 korriku 2017. Mirëqenia sociale po rritet dhe do të ngritet,” ka shkruar Mustafa.
Megjithatë, java e ardhshme do jetë përcaktuese për fatin e qeverisë, konkretisht dita e hënë, ku do mësohet nëse do votohet apo jo Demarkacioni me Malin e Zi. Nëse dështon ratifikimi i kësaj marrëveshjeje, sipas të gjitha gjasave zgjedhjet do shpallen në muajin qershor. /tesheshi.com/
