Kreu i LDK-së Isa Mustafa ka lënë mundësinë e dështimit të negociatave me Vetëvendosjen për qeverinë e re, duke thënë se nëse ndodh kjo, atëherë partia e tij kalon direkt në opozitë, pa preferuar të koalicionojë me forca të tjera.
“Nëse nuk arrihet marrëveshja, LDK shkon në opozitë, por në asnjë rast nuk shkon me subjekte të tjera. Nuk do të shfrytëzojmë asnjë rrugë tjetër, asnjë koalicion tjetër, nëse gjejmë zgjidhje me Vetëvendosjen.
Vet fakti që ne po zhvillojmë negociata, kjo tregon se puna nuk është kryer. Këtu s’mund të ketë fitues; ose dy palët do të jenë fituese, ose nuk do të kemi marrëveshje”, tha Mustafa në një intervistë për RTV 21.
Ndërkohë, ai ende beson se Vjosa Osmani nga partia e tij ende ka shans për të qenë kryeministre, gjersa të dalin rezultatet përfundimtare.
“Tani, zonja Osmani akoma është kandidate për kryeministre. Sepse përderisa nuk përfundon i gjithë procesi, përderisa nuk shpallen të gjitha rezultatet, të mos certifikohen, do të thotë se zonja Osmani mbetet kandidate për kryeministre dhe ne nuk diskutojmë për asnjë pozitë tjetër përderisa kjo të mos përfundojë.
Ndërsa sa i përket Ministrisë së Jashtme, do të thotë ne nuk kemi ndarë ministri, prandaj kërkush nuk mund ta caktojë apriori zonjën Osmani si ministre të Punëve të Lashtme, përderisa LDK-ja nuk e ka marrë Ministrinë e Jashtme.
A do ta marrim a s’do ta marrim, prapë mbetet çështje që ne do ta vlerësojmë brenda LDK-së dhe me partnerin tjetër”, tha Mustafa. /tesheshi.com/
