Maja Koçijançiç, “gjuha” e Mogherinit në Bruksel, e ka moderuar qëndrimin e saj në lidhje me “Trepçën”, e kjo pas reagimeve të ashpra të ardhura nga Prishtina.
Koçijançiç deklaroi se “Trepça” duhet të jetë çështje e dialogut mes Prishtinës e Beogradit. Reagimi i saj erdhi pas miratimit të një ligji për “Trepçën” i cili inatosi serbët. Ligji e “betonoi” ndërmarrjen e njohur minerare në veri të Kosovës, për të qenë pronë e pandryshueshme e Kosovës.
“Sa i përket çështjes nëse Trepça është pjesë e bisedimeve, Bashkimi Evropian si lehtësues, gjithnjë e ka bërë të qartë se agjenda e bisedimeve caktohet nga Beogradi dhe Prishtinë. Ne nuk komentojmë çështjet që ata duan t’i diskutojnë. Ata i sjellin në tryeze çështje të cilat i konsiderojnë të hapura dhe pastaj vendosin nëse duhet t’i diskutojnë të gjitha ato çështje, ashtu që të arrijnë një marrëveshje ligjërisht të detyrueshme për të gjitha temat e hapura”, i tha së fundi Zërit të Amerikës, zëdhënësja e BE-së Koçijançiç. /tesheshi.com/
