Kancelarja gjermane Angela Merkel ka pranuar kërkesën e presidentit turk Recep Tayyp Erdogan, i cili kërkonte hapjen e një procesi ndaj komikut Jan Boehmermann, autor i një poezie satirike të bërë ndaj tij. Sipas kodit penal gjerman, qeveria e Berlinit duhej të vendoste dhe t’u jepte autorizimin prokurorëve për nisjen e hetimeve.
Merkel përmendi “pikëpamjet e kundërta mes partnerëve të koalicionit”, dhe theksoi se “ky nuk është një vendim mbi themelin e çështjes”. Në vendim kanë marrë pjesë, veç kancelares, edhe zëvendës kancelari Sigmar Gabriel si dhe ministrat e Jashtëm, të Brendshëm dhe ai i Drejtësisë.
Merkel shtoi se Berlini po përgatitet për eliminimin nga kodi penal i artikullit 103, i cili ndëshkon fyerjet ndaj përfaqësuesve të një vendi të huaj, i cili parashikon një dënim prej 3 vitesh burg.
Ekspertët e ministrisë së Jashtme, të Drejtësisë si dhe liderët e qeverisë kanë analizuar për pesë ditë rresht kërkesën e Ankarasë, përpara se të merrnin një vendim të tillë. Në këtë çështje përballeshin nga njëra anë marrëdhëniet me Turqinë dhe nga ana tjetër respekti ndaj lirisë së shprehjes. Rasti nuk ka precedentë të tjerë në Gjermani dhe ka shkaktar mjaft polemika në vend.
Turqia është shprehur se poezia e Boehmermann nuk i drejtohej vetëm Erdoganit, por ishte kundër popullit turk, ndaj i ka kërkuar Gjermanisë që të hapë një çështje penale ndaj komikut. Vetë Erdogani pa paraqitur ditën e hënë një kallëzim personal në prokurori.
Gjithçka nisi pas acarimit të Ankarasë për një program satirik politik të quajtur “extra 3”, i cili transmetohej në entin publik NDR dhe kishte transmetuar një këngë rap në të cilën kritikohej mënyra e qeverisjes së Erdoganit.
Si reagim ndaj kritikave, Böhmermann ka lexuar një poemë të titulluar “Kritika shpifëse”, më 31 mars, në emisionin e tij televiziv. /tesheshi.com/
