Është ironike të mendohet së në 6 vite radhazi janë kujtuar përvjetorët e katër vrasjeve të 21 janarit, por asnjëherë videoja e famshme Meta – Prifti, që, jo edhe për pasojat e saj deri në humbjen e katër jetë njerëzish, mbetet një ndër pikat më kulmore të shpërfaqjes së grykësisë në politikën shqiptare, me në qendër Ilir Metën, një prej eksponentëve më “historikë” të 26 viteve pluralizëm, që, edhe pse hyri nga hiç në politikë, pa qenë dikush në ndonjë lëmë, arriti t’i japë tonin asaj, siç ndodh dhe sot e gjithë ditën.
Kujtojmë që para 6 vitesh ai ishte në krah të Berishës, një “patericë” e tij, siç do e quante Rama, duke shijuar një mandat pushteti të fituar aksidentalisht nga rezultati i ngushtë i zgjedhjeve të vitit 2009. Njerëz të tij dhe ai vetë po shijonin llokmat që po u jepte Berisha në të gjitha nivelet, pa kursim, mjaft që po e mbanin dhe katër vjet të tjera në qeverisje. Kjo situatë shkonte për shtat dhe me shëndetin e tij, ku fiziku i bëshëm i shkonte më së miri perceptimit të oponionit se LSI po vinte dhjam nga pushteti i Berishës.
Më pas ndodhi ajo që tashmë të gjithë e dimë. Meta ia arriti të merrte nga drejtësia një indulgjencë, duke u profetizuar akoma dhe më tepër tek përkrahësit e tij që shpërthyen në thirrjet “Meta, e vërteta!”, sapo u dha vedikti final që u thoshte shqiptarëve pak a shumë se ajo që patë në video ishte thjesht një film artistik pasdarkeje me subjekt jo real.
Sot, falë dhe fizikut krejt tjetër të Metës, që do i shkonte shumë përshtat një etiketim si “balerin politik”, ajo video pothuajse është harruar, falë sklerozitetit të politikës, por dhe popullit, që vjen prej një mjerimi moral që e ka ngërthyer.
Meta, realisht ka dalë më i fortë dhe krejtësisht imun pas asaj videoje. PD aq që guxon t’ja përmend, pasi Berisha i investua fort që ai të dilte i pafajshëm, duke darkuar nën përkujdesjen gastronomike të Monikës një ditë para gjyqit. E po ashtu dhe kahja tjetër, Rama, i cili vendosi t’ja falë atë proçkë për hir të së ardhmes, Rilindjes.
Meta sot është përfituesi më i madh i Rilindjes, duke e kuruar dhe rehabilituar tërësisht figurën e tij. Dhe kjo është shumë më e rëndë se mosndëshkimi i vrasësve, edhe politikë, të katër njerëzve atë ditë në bulevard.
Por le ta shijojmë dhe njëherë atë video, meqë jemi në prag të 21 janarit. /tesheshi.com/
