Nga Mensur Krasniqi
Rilindja Demokratike Kombëtare(RDK), pjesë e koalicionit Aleanca për Shqiptarët, ka reaguar pas njoftimit të djeshëm të LR-PDSH-së, forcë e udhëhequr nga Ziadin Selam, se kjo parti është shkrirë dhe ka ndryshuar emrin, ku tani e tutje do quhet Aleanca për Shqiptarët.
Nga RDK thonë se LR-PDSH-ja përpiqet të përvetësojë emrin e Aleanca për Shqiptarët duke dorëzuar dokumente se “gjoja” persona të caktuar i kanë dorëzuar ato ku shprehet dëshira për mbylljen e Aleanca për Shqiptarët, gjë e cila sipas sipas tyre është e pavërtetë.
“Njëri nga personat e lartë të strukturës së LR-PDSH, Arif Musa, më datë 21.08.2017 dorëzon dokument të përpiluar nga ana e tyre të datës 03.08.2017, të cilin ua përcjellim mediave që të kuptojnë drejtë lojën e LR-PDSH për të përvetësuar logon e Aleancës për Shqiptarët. Në këtë dokument tentohet të falsifikohet se kinse tri subjektet që e përbëjnë Aleancën për Shqiptarët, LR-PDSH, RDK dhe UNITETI, janë dakorduar të mbyllin Aleancën për Shqiptarët, diçka që nuk është aspak e vërtetë. Kjo është një tendencë e qartë për të manipuluar opinionin e gjërë shqiptar për prishjen e Aleancës për Shqiptarët nga vet LR-PDSH. Me këtë tentim dokument tentohet të dëshmohet para opinionit se kinse kërkesën për mbylljen e Aleancës për Shqiptarët e ka bë RDK dhe UNITETI, që shihet haptazi se ne nuk kemi bë një kërkesë të tillë dhe ne asnjëherë nuk kemi nënshkruar një dokument të tillë. Me këtë lojë, LR-PDSH tenton të shpëtoj fytyrën e vet para shqiptarëve për prishjen e Aleancës për Shqiptarët, dhe përvetësimin e emrit para zgjedhjeve lokale me shpresë se do të manipulon edhe më tutje në emër të Aleancës për Shqiptarët. Ky tentim lojë, dëshmon se LR-PDSH pas prishjes së Aleancës për Shqiptarët ka humbur besimin në vete se mund të arrij ndonjë fitore te elektorati shqiptarë”, thuhet në njoftimin e RDK-së.
Siç kuptohet nga kumtesa e RDK-së, këto informata për mbyllje të Aleancës dhe ndryshimit të emrit të LR-PDSH-së janë të papranueshme për RDK-në dhe UNITETIN, kurse kësaj të fundit i shprehin sukses me “emrin origjinal”.
“RDK dhe UNITETI i urrojnë rrugë të mbarë LR-PDSH në emrin e tyre origjinal, por i porosisim që të mos manipulojnë në emër të Aleancës për Shqiptarët, sepse pas fitores së parë të tri deputetëve në emër të Aleancës për Shqiptarët me kësi lojërash do ju vijnë dështimet e njëpasnjëshme dhe zhgënjim i madh, sado që të thirren në emër të Aleancës për Shqiptarët, dhe në emër të pjesmarrjes në pushtet”, thonë nga RDK.
Para dy ditësh Ziadin Sela njoftoi se LR-PDSH nuk do të ekzistojë si subjekt pasi që e njëjta do të quhet Aleanca për Shqiptarët.
Kujtojmë se në zgjedhjet e fundit Aleanca për Shqiptarët nuk ishte parti politike, por koalicion i përbërë nga 3 parti, LR-PDSH, UNITETI dhe RDK.
Përveç RDK-së, kundër emërimit të LR-PDSH-së në Aleanca për Shqiptarët ka dalë edhe kreu i UNITETIT, Gëzim Ostreni.
Ai në një prononcim për portalb shprehi revoltën ndaj Ziadin Selës, duke e pyetur se me çfarë guximi ka mund ta keqpërdor emrin e koalicionit dhe ta përvetësojë si emër të partisë së tij.
“Aleanca për Shqiptarët është marrëveshja jonë për zgjedhjet parlamentare dhe atë nuk ka të drejtë ta shfrytëzojë askush siç guxon të shfrytëzojë veprimet tona gjatë fushatës. Aleanca për Shqiptarët është koalicion dhe si mund të përvetësohet nga LR-PDSH-ja? Nga ajo që po ndodh së fundmi shihet se LR-PDSH dëshiron të largohet nga Aleanca, kurse UNITETI dhe RDK do të ngelen në koalicion”, tha Ostreni.
Një përçarje e tillë ndërmjet 3 subjekteve në fjalë nuk ishte diçka e papritur, e aq më shumë duke pasur parasysh karakterin e panatyrshëm të partive politike, pjesë e koalicionit.
Pra, nga njëra anë ishte UNITETI, parti kjo me kryetar ish-mikun më të ngushtë të liderit të BDI-së, Ali Ahmetin, Gëzim Ostreni dhe nga ana tjetër Vesel Memedin, kryetar i RDK-së, njëri nga penguesit më të mëdhenj të unifikimit opozitar kundër BDI-së. /tesheshi.com/
a
