Makinat elektrike përbënin 89 për qind të makinave të reja të shitura në Norvegji vitin e kaluar, duke e sjellë vendin edhe më afër arritjes së qëllimit të tij për t’u bërë plotësisht elektrike deri në vitin 2025, raporton AFP.
“Ne na duhen vetëm 10 për qind më shumë për të arritur objektivin e vitit 2025”, njoftoi në një deklaratë Shoqata Norvegjeze e Transportit Rrugor (OFV).
Nga 128,691 regjistrime të reja vitin e kaluar, 114,400 ishin makina elektrike, pjesa më e madhe e tregut të çdo industrie të madhe kombëtare automobilistike, nga 82 për qind në 2023.
Pavarësisht se është një prodhues i madh i naftës dhe gazit, madje i zhvilluar e bërë i pasur pikërisht prej tyre që në vitet ‘60-‘70, Norvegjia planifikon t’i bëjë të gjitha makinat e reja të shitura me emetim zero duke filluar nga viti 2025, 10 vjet përpara objektivit të vendosur nga Bashkimi Evropian.
Në vitin 2012, makinat elektrike përbënin vetëm 2.8 për qind të shitjeve, por që atëherë ato janë rritur ndjeshëm falë stimujve të ndryshëm.
Të përjashtuar nga taksat
Makinat elektrike janë të përjashtuara nga shumë taksa, gjë që i ka bërë konkurruese me makinat me djegie të brendshme që i nënshtrohen taksave të larta. Ato gëzojnë gjithashtu përjashtime nga taksat, parkimi falas në parkingjet publike dhe përdorim të korsive të transportit publik.
Edhe pse disa lehtësime tatimore dhe stimuj janë ulur me kalimin e viteve, makinat elektrike janë bërë të zakonshme.
“Është thelbësore të ruhen stimujt që favorizojnë blerjen e makinave elektrike nëse Qeveria dhe Parlamenti duan të arrijnë qëllimin që kanë vendosur vetë”, tha Oyvind Solberg Thorsen, drejtor i OFV.
Tesla është kompania lider e makinave elektrike në Norvegji, me 19 për qind të tregut, e ndjekur nga Volkswagen, Toyota, Volvo dhe BMW. /tesheshi.com/
