Siç për pavarësinë, SHBA përcollën një urim dhe për Ditën e Çlirimit, 29-ën e “gjermanit të fundit” që la Shqipërinë në 44-ën, sipas tezës historinë të së majtës.
Ndërkohë, kjo kundërshtohet nga e djathta, me tezën se çlirimi ka ndodhur me 28 nëntor ’44, por që Enver Hoxha e zhvendosi një ditë më pas për ta njehsuar çlirimin me jugosllavët.
Kjo ka qenë që për gati 30 vite të vijojë ky debat, ku sa herë është PS në pushtet festohen dy datat, e sa herë është PD të festohet vetëm 28-a, me Pavarësinë dhe Çlirimin në një ditë.
Po ndërkombëtarët ç’qëndrim kanë mbajtur në këtë debat? Pothuajse asnjë qëndrim. Por ja, SHBA, një pol antikomunist i botës, e njeh 29-ën komuniste, pasi ka vendosur që të përcjellë një urim.
Ambasada amerikane në Tiranë ka zgjedhur disa vargje të Naimit në kartolinën e saj korteziale, duke e pasuar me fjalët: “Me këto vargje frymëzuese nga poeti i madh Naim Frashëri, ne nderojmë Ditën e Çlirimit të Shqipërisë“.
Kjo po që është ironi! Ironia tjetër është se në tre dekada post-komunizëm, politika amerikane në Shqipëri nuk ka patur asnjë çarje apo krizë me të majtët, në kushte pushteti apo opozite. E kundërta me PD-në e vetëdeklaruar si e djathtë: në pushtet apo opozitë, ka patur ftohje, çarje, deri dhe kriza me Uashingtonin. /tesheshi.com/
