Në prag të mbajtjes së seancës gjyqësore ndaj ish-ministrit të Brendshëm Saimir Tahiri, një nga gjyqtaret e trupit gjykues është tërhequr.
Bëhet fjalë për Daniela Shirka, e cila do të zëvendësohet nga gjyqtari Florjan Kalaja, gjyqtar i komanduar në Gjykatën e Apelit Durrës, i cili ka kaluar vetingun në fund të vitit 2020. Ky i fundit është vëlla i aktivistit Aulon Kalaja, njëherësh i afërt me strukturat e PD-së.
Por më interesant është një emër tjetër në gjykimin e pritshëm ndaj Tahirit, gjykatësi i Fierit Engert Pëllumbi. Për ironi, ky i fundit u listua nga ish-ministri i Rendit pak vite më parë si ndër emrat problematikë në sistemin e drejtësisë.
Pra, kur Tahiri qe ministër, në kulmin e fuqisë së tij dhe në nisje të Reformës në Drejtësi, do listonte emra nga drejtësia që sipas tij kishin probleme në verdiktdhënie, por pa sqaruar konkretisht se për ç’rast.
Engert Pëllumbi ishte një prej tyre, i cili tashmë do e gjykojë njeriun që e ka gjykuar. Nga ana tjetër, vettingu e nxorri tërësisht të pastër gjykatësin e Fierit. /tesheshi.com/
