Historia ka marrë një kthesë të çuditshme në Shqipëri. Partia që mban xanxën si trashëgimtare e PP-së famëkeqe, pasuese e PKSH-së së 41-shit, pra PS, ka marrë tashmë flamurin e pastrimit të politikës nga ish-bashkëpunëtor të Sigurimit të Shtetit. Kjo, pasi dyshohet që dhe Ilir Meta të ketë qenë i tillë, aq më shumë Berisha, edhe si ish-komunist e Sekretar Partie.
Një ditë më parë, PS dorëzoi në Kuvend ndërhyrjet ligjore për këtë çështje, ndërkohë që kreu i mazhorancës ka paralajmëruar se mund të ketë dhe një seancë të jashtëzakonshme në në gusht, pra pa pritur shtatorin, për të votuar heqjen e një pengese ligjore e cila do çonte në zbardhjen e shumë dosjeve për emra aktivë në politikë, me qëllim lënien jashtë të tyre nga politika.
Kjo është potencuar së fundi dhe nga kreu i grupit parlamentar të PS-së, Taulant Balla.
“Ngjitja e bashkëpunëtorëve të sigurimit të shtetit, një shërbimi sekret terrori, në të gjitha majat e piramidës shtetërore, ka bërë të domosdoshëm miratimin sa më parë nga Kuvendi i Shqipërisë, në sesionin e ri që nis në shtator, të ndërhyrjeve ligjore që janë depozituar tashmë sipas propozimit të Autoritetit të Dosjeve, për të rishikuar certifikatën e pastërtisë të kujtdo që ka hyrë në politikë me përgjues në trup, si shërbëtor i Sigurimit të Shtetit.
Kuvendi i Shqipërisë do të duhet të adresojë gjatë sesionit të ri edhe situatën e papranueshme dhe absurde prej një viti se si një sekretar partie i shpallur non grata nga Shtetet e Bashkuara të Amerikës dhe Mbretëria e Bashkuar, vazhdon të përdhosë këtë institucion me praninë dhe gjuhën e tij.
Ne nuk ia drejtojmë dot bishtin as non gratës as bashkëpunetorëve, por ne nuk mund dhe nuk duhet të lejojmë të keqen të vazhdojë të bëjë moral me shpresën se do të hajë kokën e vet, madje absurdi të shkojë deri aty sa këta lloj të bërtasin për drejtësi, kur janë vetë ata që kanë hesapet më të mëdha me drejtësinë dhe Shqipërinë”, shkruan Balla.
Pra, pasi PD kompromentoi në vite çështjen e dosjeve, duke lënë shumë dritëhije mbi to si dhe mbi veten, tashmë është PS-ja që ia rrëmben këtë mision. Për ironi, nga një forcë që dhe sot e kësaj dite shihet me sy ideologjik si kinse komuniste. /tesheshi.com/
