Mund të quhet i mbyllur kapitulli i Kokëdhimës në PS. Pas heqjes së mandatit të deputetit nga Kushtetuesja – për të cilën ai akuzoi dhe kolegët deputetë të partisë së tij që i hapën rrugë me votë – si dhe pas divorcit me Ramën, filimisht mik e më vonë bashkëpartiak, vjen tashmë dhe “zbimi” i tij nga selia rozë duke u shkarkuar nga posti i Sekretarit për Reformën Strukturore, për t’u zëvëndësuar nga…Stefan Çipa – dhe këtu nis ironia – njeriu që Koçoja e “zboi” nga drejtimi i Bashkisë së Sarandës.
Sinjalet u dhanë në fakt që kur Çipa u emërua z/ministër i Brendshëm, e ku iu besua si detyrë parësore procesi i regjistrimit të emigrantëve, edhe ky një sektor që i ishte besuar Koços; por në kuadër partiak e jo qeveritar.
E tashmë, Stefan Çipa ngjan të ketë ngadhnjyer mbi njeriun që jo vetëm ia solli në majë të hundës gjatë një viti si deputet i zonës, duke i mbirë në zyrë, por dhe duke ia marrë më pas atë me anë të sekretares së vetë, Floriana Koka, e përzgjedhura e Kokëdhimës që sot është kryetare e bashkisë së qytetit jugor buzë Jonit. Çipa në atë kohë bëri një shkrim të ashpër ndaj Kokëdhimës, por Ramën e kurseu.
Dhe kjo është e dyta herë që ai shpërblehet nga Rama për gjuhëmbajtjen e tij. Interesante raporti mes Ramës dhe Çipës. Ky i fundit i përket kastës së vjetër të socialistëve të periudhës “Nano”. Madje me Gramoz Ruçin mund të jenë të vetmit që kanë mbetur në PS në role drejtuese.
Në zgjedhjet e 2009-ës, Rama i mënjanoi në kandidaturat për deputetë, aty ku gjithëherë shpalosen preferencat dhe jo preferencat e liderit. Mes të mënjanuarve ishte dhe Stefan Çipa, hatërmbetur sigurisht, por gojëkyçur.
Dy vjet më pas, Rama i tregohet mirënjohës për këtë virtyt edhe politik, duke e kandiduar për Bashkinë e Sarandës, qytetit të tij. Dhe tashmë vjen rasti i dytë kur Rama e shpërblen Çipën, kësaj here edhe duke i dhënë kënaqësinë e hakmarrjes mbi Kokëdhimën, pas rrëmbimit prej këtij të fundit të dy pozitave. Zhvillim serioz, por dhe i lezetshëm! /tesheshi.com/
