Majemi është tashmë nën ujë, ndërkohë që edhe disa qytete të tjera në bregun lindor të Floridës po presin të njëjtin fat, pasi “Irma” po shkon duke u rritur përherë e më shumë. Kryesisht, era në kombinim me ujin e oqeanit paraqesin shqetësimin më të madh.
Qytetet në dy brigjet e Floridës po e përjetojnë “Irmën” në mënyra të ndryshme – qytetet perëndimore ende regjistrojnë tërheqjen e ujit dhe diku “zhdukjen” e plotë të bregdetit, ngase era fryn nga lindja dhe shtyn ujin kah deti i hapur.
https://youtu.be/ucbsuZlWx3A
Ndërsa stuhia kalon në veri, drejtimi i erës do të ndryshojë, kështu që perëndimi do të përjetojë një kthim të papritur të ujit nga oqeanet, ku priten valë të mëdha deri në pesë metra, veçanërisht në qytetin e Napolit dhe në ishullin Marco.
Napoli është i vendosur në pjesën qendrore të rrugës “syri i uraganit”, muret e të cilit krijojnë goditjet më të shpejta të erës. Nga ana tjetër, bregdeti lindor tashmë po përjeton një depërtim të fuqishëm të ujit në qytete dhe vendbanime.
Siç raporton CNN, në disa vende parashihen valë të përnjëhershme disa metra të larta, prandaj qytetarët luten që sa më shpejt që të jetë e mundur, të ngjiten në pjesë të larta të ndërtesës, nëse për këtë do të kenë mundësi.
Qendra më e madhe urbane që është goditur nga stuhia Irma është Majemi, e cila së bashku me rrethinat ka 5.5 milion banorë. Qendra e qytetit është e përmbytur plotësisht dhe thellësia e ujit në disa vende është më shumë se 100 centimetra.
Fuqia e stuhisë ka rënë dhe është regjistruar si një stuhi e kategorisë së tretë, por erërat në Florida po forcohen, sepse stuhia sapo ka filluar të depërtojë në gjysmë-ishull dhe do të rimarrë forcën e saj të plotë gjatë orëve të ardhshme. Erërat fryjnë në shpejtësinë prej rreth 200 kilometrash në orë, kurse uragani sot krijoi të paktën tre tornado lokale.
https://youtu.be/3PXuwIHSgEY
Autoritetet aktualisht nuk mund të fillojnë një operacion shpëtimi, sepse është ende shumë e rrezikshme, kurse sipas informacioneve të para raportohet për tre viktima. Numri do të rritet sapo ekipet e para të dalin në terren.
E ndërkohë që miliona njerëz po përjetojnë tmerre e duan të shpëtojnë kokën, ka dhe nga ata që u punon mendja për të grabitur në një situatë ku banesat janë të boshatisura nga evakuimi i banorëve.
Një shkëmbim zjarri u regjistrua gjatë arrestimit të kriminelëve që u përpoqën të vidhnin një shtëpi. /tesheshi.com/
