Ministri i Jashtëm iranian Mohammad Javad Zarif u ka bërë thirrje “miqve”, duke përfshirë Kinën dhe Rusinë, për të marrë “veprime konkrete” lidhur me mbrojtjen e marrëveshjes bërthamore të vitit 2015.
Në një vizitë në Pekin, Zarif tha se ai do të bisedojë me zyrtarët kinezë rreth “lidhjeve dypalëshe dhe çështjeve shumë të rrezikshme që po ndodhin në Iran”.
Javën e kaluar, Zarif kishte thënë se vetëm Rusia dhe Kina mbështetën Iranin dhe ndihmuan në mbajtjen e marrëveshjes bërthamore, teksa akuzoi palët e tjera për braktisjen e marrëveshjes së Teheranit.
Kina ishte një nga tetë blerësit globalë që u lejua të importojë naftën e papërpunuar iraniane, ndërsa shtatë vendet e tjera që vazhdojnë tregtinë janë India, Turqia, Japonia, Koreja e Jugut, Tajvani, Italia dhe Greqia.
Mes tensioneve në rritje në Gjirin Persik, Irani të enjten hodhi poshtë negociatat me SHBA dhe tha se po tregonte “kufizim maksimal” pasi Uashingtoni dërgoi forca ushtarake shtesë në rajon kundër asaj që pretendonte se ishte një kërcënim nga Teherani.
Por Trump mori një “ton të butë” po atë ditë, pasi shkroi në Twitter se po priste që Irani të kërkonte bisedime. I pyetur nëse SHBA mund të jetë në rrugën e luftës me iranianët, presidenti u përgjigj: “Shpresoj se jo.”
Pavarësisht fushatës së Uashingtonit për “presion maksimal” kundër Iranit, vendi është zotuar se do të vazhdojë të shesë naftë tek klientët kryesorë të saj, sidomos në Kinë, edhe nëse do të përdorë mjete indirekte.
Më 8 maj, presidenti iranian Hassan Rouhani tha se Irani do të ndalonte respektimin e kufizimeve në rezervat e uraniumit të pasuruar në formë hakmarrjeje për tërheqjen e SHBA dhe ri-vendosjen e sanksioneve.
Në njoftimin e tij, Rouhani kërcënoi të shkonte edhe më tej nëse anëtarët europianë të marrëveshjes nuk arrijnë t’i mbajnë premtimet e tyre për të ndihmuar Iranin që të shmangë sanksionet brenda 60 ditëve.
Në përgjigje, Kina u bëri thirrje të gjitha palëve të mbështesin marrëveshjen bërthamore, duke e quajtur atë një “përgjegjësi të përbashkët”. /tesheshi.com/
