Të hënën, Irani akuzoi SHBA-në për “zvarritje” në negociatat indirekte për të ringjallur marrëveshjen bërthamore të vitit 2015 midis fuqive botërore dhe Teheranit.
Pas gjashtëmbëdhjetë muajsh negociata midis Uashingtonit dhe Iranit, të ndërmjetësuara nga Bashkimi Evropian, një zyrtar evropian tha më 8 gusht se ai kishte paraqitur një ofertë “përfundimtare” dhe priste një përgjigje brenda disa javëve të ardhshme.
Irani iu përgjigj BE-së javën e kaluar me “pikëpamje dhe konsiderata shtesë”, ndërsa i kërkoi Uashingtonit të ishte fleksibël për të zgjidhur tre çështjet e mbetura të diskutueshme.
SHBA njoftoi javën e kaluar se po shqyrtonte përgjigjen e Iranit.
Amerikanët po zvarriten
“Amerikanët po zvarriten dhe pala evropiane është joaktive. Amerika dhe Evropa kanë nevojë për një marrëveshje më shumë se Irani”, tha zëdhënësi i Ministrisë së Jashtme iraniane, Nasser Kanani.
Ai tha se Teherani dëshironte një marrëveshje të qëndrueshme që do të ruante “të drejtat legjitime” të Iranit.
“Derisa të jemi dakord për të gjitha çështjet, nuk mund të themi se kemi arritur një marrëveshje të plotë”.
Në të njëjtën kohë, Uashingtoni përsërit thirrjet e tij drejtuar Teheranit për të liruar një numër iranio-amerikanësh të ndaluar në atë vend për arsye sigurie. Në këmbim, Irani po kërkon lirimin e iranianëve të ndaluar nën sanksionet e SHBA.
“Ne theksojmë se shkëmbimi i të burgosurve me Uashingtonin është një çështje më vete dhe nuk ka të bëjë me procesin e negociatave për ringjalljen e marrëveshjes nga viti 2015”, tha Kanani, duke shtuar se Teherani është i gatshëm të shkëmbejë të burgosurit.
Trump rivendosi sanksionet amerikane
Në vitin 2018, ish-presidenti republikan Donald Trump u tërhoq nga marrëveshja midis Teheranit dhe fuqive botërore, duke e quajtur atë shumë të butë ndaj Iranit dhe duke rivendosur sanksionet amerikane.
“Ne po kërkojmë një marrëveshje të mirë që do të garantojë interesat kombëtare të Iranit dhe do të zgjasë një kohë të gjatë”, theksoi Kanani, duke shtuar se Irani nuk do të bëjë të njëjtin gabim dy herë.
Marrëveshja e vitit 2015 u shfaq në prag të ringjalljes në mars, pas 11 muajsh bisedimesh indirekte midis Teheranit dhe përfaqësuesve të qeverisë së presidentit amerikan Joe Biden në Vjenë.
Por bisedimet kanë dështuar për shkak të pengesave të tilla si kërkesa e Iranit që Uashingtoni të garantojë se asnjë president amerikan nuk do të dalë nga marrëveshja si Trump, gjë që Biden nuk mund ta bëjë. /tesheshi.com/
