Irani ka deklaruar se vendimi amerikan për të urdhëruar sanksione ndaj liderit të saj suprem dhe zyrtarëve të tjerë ka mbyllur përgjithmonë rrugën e diplomacisë midis Teheranit dhe Uashingtonit.
“Vendosja e sanksioneve të padobishme ndaj udhëheqësit suprem të Iranit (Ajatollah Ali Khamenei) dhe kreut të diplomacisë (Ministrit të Jashtëm Mohammad Javad Zarif) është mbyllje e përhershme e rrugës së diplomacisë”, tha zëdhënësi i Ministrisë së Jashtme Abbas Mousavi në një postim në Twitter.
Presidenti i SHBA-ve Donald Trump dje nënshkroi një urdhër ekzekutiv duke imponuar sanksione të reja kundër udhëheqësit suprem të Iranit, Khamenei dhe tetë komandantëve të Gardës Revolucionare. Vendimi erdhi pasi tensionet shënuan ngritje, pikërisht pas rrëzimit të një droni amerikan nga ana e Teheranit.
“Veprimi i sotëm vjen si pasojë e një sërë sjelljesh agresive nga regjimi iranian, duke përfshirë rrëzimin e avionëve amerikanë,” njoftoi Trump nga Zyra Ovale e Shtëpisë së Bardhë, duke i quajtur sanksionet “të ashpra”.
Fuqitë botërore kanë bërë thirrje për qetësi dhe kanë dërguar emisarë të posaçëm për të lehtësuar mosmarrëveshjen që ka ngritur jo vetem çmimin e naftës, por edhe frikën për katastrofa të mëtejme. /tesheshi.com/
