Irani ofron bashkëpunim pas nënshkrimit të marrëveshjes bërthamore me Perëndimin, e synin të rifitojë besimin e fqinjëve për të promovuar paqen në rajon.
Zv.presidentja iraniane, Masumeh Ebtekar tha për BBC se Irani rezervon të drejtën për t’u vetëmbrojtur, por shtoi se nuk është synimi i Republikës Islamike dominimi në rajon.
“Shpresojmë të rifitojmë besimin e fqinjëve dhe të bashkëpunojmë në luftën kundër grupeve ekstremiste”, shtoi ajo.
Irani është akuzuar në vijimësi nga Perëndimi dhe Izraeli si nxitës i konflikteve në rajon, pasi ka pasur dyshime se Teherani furnizon me para dhe armatime presidentin sirian, Bashar al-Assad dhe grupin militant shiit, Hezbollah. Arabia Saudite e akuzoi së fundmi Teheranin se mbështet lëvizjen e rebelëve Houthi në Jemen.
Por, ndërsa përballet me mosbesimin e fqinjëve, Irani ka pasur një rol të rëndësishëm në luftën kundër Shtetit Islamik. Ai ka mobilizuar forca dhe ka dërguar këshilltarë ushtarakë në terren.
Ebtekar e cilësoi marrëveshjen e arritur me fuqitë e mëdha perëndimore për programin bërthamor si një hap përpara për gjithë botën.
“Kjo është nisja e një epoke të re bashkëpunimi tregtar, ekonomik e kulturor dhe Irani do të jetë një lojtar i rëndësishëm në këtë pjesë”, deklaroi Ebtekar. /tesheshi.com/
