Oferta e Kurdistanit për pavarësi është pjesë e një plani të huaj për krijimin e një Izraeli të ri në Lindjen e Mesme, deklaroi Teherani zyrtar. Udhëheqësi suprem i Iranit Ayatollah Ali Khamenei tha se SHBA-të dhe Izraeli përfitojnë nga krijimi i një Kurdistani sovran, njofton TV shtetëror.
Kurdistani, aktualisht një rajon autonom në Irakun e veriut, i zemëroi fqinjët e tij muajin e kaluar duke mbajtur një referendum mbi pavarësinë. Më shumë se 90 për qind e mbështetën ndarjen nga Bagdadi në referendumin e 25 shtatorit. Izraeli ishte një nga vendet e pakta që ka mbështetur pavarësinë e Kurdistanit, ndërsa SHBA-të ishin kundër saj për shkak të frikës se do të zhvendoste vëmendjen nga lufta kundër ISIL.
Khamenei, menjëherë pas një takimi me presidentin turk, Rexhep Tajip Erdogan, tha se të dy vendet duhet të parandalojnë Kurdistanin nga shpallja e pavarësisë. “Amerika dhe Izraeli përfitojnë nga votimi,” tha ai. “Ata duan të krijojnë një Izrael të ri në rajon.
Votimi i ndarjes së kurdëve të Irakut është një akt tradhtie ndaj gjithë rajonit,” shtoi ai. Ky reagim vjen pasi kryeministri irakian Haider al-Abadi kërkoi që autoritetet kurde të anulojnë referendumin për pavarësinë. Ai gjithashtu i ndaloi fluturimet ndërkombëtare në rajon.
Qeveria Rajonale e Kurdistanit këmbëngul se votimi ishte legjitim dhe akuzoi Abadin për “ndëshkim kolektiv”. /tesheshi.com/
