Ministria e Jashtme iraniane i ka kërkuar Turqisë t’i japë fund operacioneve ushtarake kundër rebelëve kurdë në rajonin sirian të Afrinit.
“Turqia duhet të mbrojë integritetin territorial të Sirisë dhe të respektojë sovranitetin e saj kombëtar”, tha Bahram Qasemi, një zëdhënëse e Ministrisë së Jashtme në një konferencë të rregullt javore për shtyp.
“Republika Islamike është e shqetësuar për ngjarjet e fundit në Afrin, si dhe mundësinë që operacioni ushtarak turk mund të sjellë kthimin e terroristëve në Siri”, tha Qasemi.
Sipas tij, Turqia duhet të zgjidhë çështjet lidhur me Sirinë në takimin trepalësh të përfaqësuesve zyrtarë të Teheranit, Moskës dhe Ankarasë.
Operacioni turk “Dega e Ullirit” u nis më 20 janar me qëllim të dëbimit të njësive të milicisë kurde të Njësisë për Mbrojtjen e Popullit nga rajoni Afrin.
Ankaraja e konsideron YPG-në grup terrorist, zgjatim të Partisë së jashtëligjshme të Punëtorëve të Kurdistanit, e cila ka luftuar për tre dekada me autoritetet turke në juglindje të vendit, duke kërkuar autonomi.
Në këto operacione, Turqia ka humbur 15 ushtarë dhe pretendon se ka eliminuar 900 luftëtarë kurdë, por kjo nuk është konfirmuar.
Në të njëjtën kohë, të paktën shtatë civilë u vranë në sulmet me raketa siriane në qytetet kufitare turke, kurse qindra mbetën të plagosur. /tesheshi.com/
