Irani ka përshpejtuar pasurimin e uraniumit në fabrikën e tij nëntokësore në Fordow, falë makinerive të avancuara që mund të kalojnë më lehtë midis niveleve të pasurimit, sipas një raporti të Agjencisë Ndërkombëtare të Energjisë Atomike (IAEA).
IAEA ka konfirmuar se Irani ka filluar injektimin e gazit heksafluorid të uraniumit të pasuruar deri në pesë për qind në kaskadat e centrifugave të avancuara IR-6 në Fordow, raporton Reuters, që i referohet një raporti konfidencial të kësaj organizate.
Irani ka informuar IAEA-n se planifikon të përdorë makineritë e pasurimit të uraniumit për të arritur pastërtinë 20 për qind, thuhet në raport, por duke përdorur pajisje të reja centrifuguese ai mund të arrijë shumë shpejt pastërtinë 90 për qind, e mjaftueshme për të prodhuar armë bërthamore.
Diplomatët perëndimorë kanë shprehur vazhdimisht shqetësimin për përdorimin e pajisjeve nga Irani që lejojnë një kalim të shpejtë dhe të lehtë në nivele më të larta të pastërtisë së uraniumit.
Sipas marrëveshjes bërthamore të vitit 2015, Irani ra dakord për kufizime në programin e tij bërthamor në këmbim të lehtësimit nga sanksionet e vendosura nga Perëndimi.
Presidenti i atëhershëm i SHBA Donald Trump u tërhoq nga marrëveshja në 2018 dhe rinovoi sanksionet amerikane, duke bërë që Irani të fillonte të shkelte kufizimet bërthamore një vit më vonë.
Të gjitha negociatat e mëparshme për ringjalljen e marrëveshjes deri më tani kanë dështuar.
Marrëveshja bërthamore e Iranit me fuqitë e mëdha dukej se ishte afër rigjallërimit në mars, por bisedimet janë bllokuar pjesërisht nëse Uashingtoni do të heqë Gardën Revolucionare, krahun elitar të ushtrisë iraniane, nga lista e organizatave të huaja terroriste. /tesheshi.com/
