Irani i ka thënë Agjencisë së Aviacionit Civil të Kombeve të Bashkuara se do të marrë kutitë zeza nga aeroplani i rrëzuar ukrainas në dy javët e ardhshme, thanë dy burime të njohur me këtë çështje.
Një përfaqësues iranian në Organizatën Ndërkombëtare të Aviacionit Civil gjithashtu tha se nëse kutitë e zeza nuk mund të dorëzoheshin në Ukrainë, ato do të dërgoheshin në Francë, tha një burim, njoftoi Reuters.
Irani ka pranuar se rrëzoi pa dashje një aeroplan pasagjerësh ukrainas, duke vrarë të gjithë prej 176 pasagjerëtve dhe anëtarëve të ekuipazhit.
Hetimi zbuloi se “gabimi njerëzor çoi në goditjen me predhë”, tha Presidenti Hassan Rouhani.
Ai e përshkroi rrëzimin e aeroplanit si një “gabim të pafalshëm”.
Ushtria deklaroi se aeroplani po fluturonte pranë një vendi të ndjeshëm të kontrolluar nga Garda Revolucionare dhe u konsiderua gabimisht si një aeroplan armik në atë kohë.
Irani fillimisht mohoi njoftimet se njëra prej raketave të saj kishte goditur një aeroplan pasagjerësh afër Teheranit.
Rrëzimi i PS752 i Ukraine International Airlines erdhi vetëm disa orë pasi Irani nisi sulme me raketa ndaj dy bazave ajrore amerikane në Irak.
Sulmet ishin si përgjigje e vrasjes së komandantit të lartë iranian Qasem Soleimani më 3 janar pranë Bagdadit. /tesheshi.com/
